سوتک کنئے، چئیرمین ءِ ترْانگاں سوچ

6

ہمے لوگ ءَ 2000 ءَ چئیرمین سالونک بیت ءُ کئیت۔ نہہ سال ءَ رند ہمے لوگ ءَ آئی ءِ تیردرْشتگیں بدن مردماں کوپگا کُت، آئورت۔

15 نومبر 2015 ءَ پاکستان ءِ فوج اتک ءُ ہمے لوگ ئےِ مانداشت۔ لوگ ءِ تہہ ءِ ہر چیز سُتک ءُ پُر بیت۔ تہنا ترْانگ پش کپتگ انت کہ ناں آس جنگ بنت ناں تیر۔

چئیرمین ءِ شہید کنگا ہپت سال گوْستہ بلے ناں منی ءُ ایدگہ بلوچانی دل ءَ پرائی ءَ مہر کم بیتہ ءُ ناں فوج ءِ دل ءَ پرائی ءَ نفرت۔ شش سال انت کہ چئیرمین ءَ ناں گشتانکے داتہ، ناں جلسہ یے کشّتہ بلے انگہ سرمچارانی دست ءَ کہ فوجی یے جَنَگ بیت آ چئیرمین ءِ لوگ ءَ تیر گواری کننت، آئی ءِ ادیرہ ءَ ڈوریننت۔ ہروہدے کہ بلوچستان ءِ آزادی ءِ نعرہ جکسیت، پاکستان ءِ گوشاں چئیرمین ءِ آواز کئیت۔

چئیرمین تو جت، آئی ءِ ادیرہ تو ڈورینت، آئی ءِ لوگ تو سوتک ءُ پُر کت، نی آئی ءِ ترْانگاں ہم آس ماندار۔ آئی ءِ گشتگیں گپاں چہ بلوچ مہلوک ءِ یادداشت ءَ دَر کن۔ اگں چو تئی دست ءَ نہ بی، پہ لوگ ءِ سوچگ ءُ ادیرہ ءِ ڈورینگ ءَ چئیرمین ہلاس نہ بی۔ غلام محمد وَ تو شہید کتہ، بلے چئیرمین ءَ چوں ہلاس کنئے؟

ہمے گِل ءِ بان کہ تو سوتکگاں اشانی تہا چئیرمین ءَ کم وہد گوْازینتہ ءُ لیاری ءِ دمکاں گیشتر۔ اگں ہپتگے وتی لوگ ءَ بیتہ، ماہے کوئیٹہ، پنجگور، ملیر، ڈیربگٹی، کوہلو، تربت، پسنی، بلیدہ، خضدار ءُ بلوچستان ءِ ایدگہ ہلک ءُ دمگاں جلسہ ءُ دیوان ئےِ کُتہ۔ چاہ ءِ ہوٹل ءَ، سنگتے ءِ مہمان جاہ ءَ، روڑی سرے ءَ، ارزانیں ہوٹلے ءِ کوٹی ءَ، تنک ءُ تہاریں دمکے ءَ۔ تو کجام کجام جاگہہ ءَ آس ماندارئے۔ اگں آس مانداشت انت ہم، ہما ترْانگاں چوں کنئے بلوچ راج ءِ دلانی تہا زندگ انت؟ چینچو دل کشّئے ءُ آس ماندارئے؟

 نہہ اپریل 2009 ءِ سہب ءَ من ہمے لوگ ءِ پیژگاہ ءَ نشتگ ءُ گریتہ۔ ہمینچو گریتہ کہ تُستگ ءُ پلار بیتگاں۔ من گُشتہ چئیرمین شہید بیت، من جنوزام ءُ منی چُک چورہ۔ باریں چُنت روچ مں پہ انچو گریوگ گوازینتہ۔ تاں ہما وہدا گرْیتہ کہ تُستگاں، بود کہ کتہ پدا گریتہ۔ نی آ ہبراں شش سال گوْستہ۔ اے ہپتیں سالاں توں چُنت رندا چئیرمین ءِ لوگ گوں تیراں درْشتہ، چینچو رندا آئی ءِ کبر ڈورینتہ، نی آئی ءِ لوگ سوتکہ۔ تئی کہ ضد ءُ کُنّت ءَ گنداں مں زاناں تئی دل ءَ چئیرمین ہست ءُ سلامت انت۔ ءُ من ہم پشوماناں کہ من پرچا اینچو گریتہ۔ ناں من جنوزام بیتگاں، ناں منی چُک چورہ۔ چئیرمین زندگ انت، تئی دل ءَ ہم، منی دل ءَ ہم ءُ بلوچ راج ءِ دل ءَ ہم۔

+ posts