Home / Balochi / شہید واجہ چئیرمین گلام مہمد ءِ یات ءَ 

شہید واجہ چئیرمین گلام مہمد ءِ یات ءَ 

بلوچ راجی جُنز ءِ تہا لہتیں انچیں سر دست کپیت کہ ہچبر بیہال کنگ نبنت۔

  اے مردم انچو کہ چہ اندرءَ زیبا ءُ ڈولدار اَنت، انچو زاہر ءَ۔ اِشانی پُرکندگیں تران ببنت یا گوں وتی مہلوک ءَ مہر، ءُ پہ سرزمین ءَ کُربان بوّگ ءِ جزبگ ءُ بہادُری۔

  چہ ہمے مردماں یکے گلام مہمد انت کہ چئیرمین ءِ پنّام ءَ زانگ بوتگ ءُ پدا یک انچیں رُتبہ ءُ شرپے ءِ واہند بوت کہ نوں شہید واجہ چئیرمین گلام مہمد گُشگ بیت۔

  پارٹی ءِ سنگتاں مدام واجہ ءِ نام ءَ توار کُتگ۔.شہید واجہ چئیرمین گلام مہمد چہ کسانی ءَ وتی وانگ ءِ دور ءَ پہ وتی سرڈگار ءِ مہر ءُ محبت ءَ ہدوک ءُ پہ وتی ماتی زبان ءَ شیدا بوتگ۔ ماتی زبان ءِ ہزمت ءَ گوں وتی بے مٹ ءُ راجی جزباگاں سرریچیں شائری ءَ کنت ءُ سرڈگار ءِ ہزمت ءَ وتا گوں بلوچ وانندہ گل بی ایس او ءَ ہمگرنچ کنت۔ آئی ءِ پہ وتی سرڈگار ءَ مہر ءُ محبت ءُ آئی ءِ علمی بود ءُ باش ہمینچک مہکم بیت کہ داں رئوت ءُ بی ایس او ءِ چئیرمینی ءَ سر بیت ءُ چمودا گلام مہمد ءِ نام ءِ دیما دگہ نامے پِر بیت، چئیرمین گلام مہمد۔

   اے ہمے دوراِنت کہ بی ایس او چہ مزنیں بُہرانے ءَ گوزیت، بلے ہمے بامردانی کُربانی بنت کہ بی ایس او ءَ یک برے پدا بحال کننت، ءُ پدا وتی سیاسی استاد شہید فدا احمد ءِ ہواری ءَ بی این وائی ایم ءَ ٹہیننت۔

   بلوچ تحریک ءِ مستریں بدبہتی اے بیت کہ ہچ وہدا چہ سرکاری کاسگ چَٹّاں بے ہچ نبیت۔ سرکار گوں وتی پندلاں، وتی جوڑ کُتگیں کہدہ ءُ میر ءُ واجہاں، یک نہ یک وڑےءَ، ہما وہد ءِ زلورت ءِ ہساب ءَ کار گران ءُ پیداک انت، پہ بلوچ راج ءِ پروش دئیگ ءِ ہاترا۔

  بلوچ تحریک ہمے دوتل ءُ دوپوستیں بلوچانی دست ءَ یک نہ یک رنگےءَ پروش وران ءُ پیداک انت۔

  شہید گلام مہمد ءِ ہمکوپگ ءُ ہم پگریں سنگت، سیاسی استاد، شہید فدا احمد وہدے چہ ہمے آستینکی مارانی چیریں ڈنگاں شہید کنگ بیت، تہ چہ اشی ءَ پد ہما گوں کپتگیں آستینکی مار مدان مدان ءَ وتی پدا پیداک کننت ءُ وتی اسلی رنگ ءَ پیشدارنت۔ اے مردم تحریک ءِ دیما ترّیننت گوں پاکستان ءِ پارلمینٹ ءَ کننت ءُ  بی ایس او ءَ وتی پاکٹ آرگنائیزیشن جوڑ کننت۔  ادا یک نیمگے پاکستان ءِ بُنکی ایجنٹ بنت کہ آئی ءَ پہ وتی مول ءُ مراد ءَ ہوارینتگ اتنت ءُ دومی نیمگا  ہکءُ راستیں مردم بنت۔ تچکءُ راستیں مردم، بی ایس او ءَ چہ پندلاں پاک کننت ءُ بی ایس او آزاد ءِ شکل ءَ دیما کارنت ءُ بلوچستان نیشنل موومنٹ ءَ بلوچ نشنل موومنٹ ءِ شکل ءُ نام ءَ دئینت، ءُ پارٹی ءَ وتی اسل مول ءُ مراد ءِ نیمگا ترّیننت کہ بلوچ ءِ آجوئی اِنت۔

   ہمے داب ءَ بی ایس او آزاد ءُ بی این ایم  جتا جتا وتی  پلیٹ فارمانی سرا پہ بلوچ ءِ آجوئی ءِ ہاترا وتی جہد ءَ برجاہ دارنت۔

   آجوئی لوٹوکیں بلوچ نیشنل موومنٹ ءِ اولی کونسل سیشن ماں کوئٹہ ءَ دارگ بیت ءُ اودا واجہ شہید گلام مہمد، پارٹی ءِ سرکماش گچین کنگ بیت۔

  پدا گلام مہمد بیت ءُ گلام مہمد ءِ سنگت بنت، گون وتی جہد ء آجوئی ءِ کاروان ءَ۔

  گلام مہمد بیہال بیت کہ آئی ءَ وتا زاتی زند ءُ زند ءِ جیڑہ است انت، آ پہ جہد ء آجوئی ءَ وتی زاتی زندگی ءِ کُلّیں شے آں کُربان کنت۔ بس گوں بلوچی دزمال ءُ گور ءِ گُداں شپ جاہ ءُ روچ جاہ، جی شاہ ء ولا، بلوچ سرڈگار ءِ کُلیں ہند ءُ دمگاں ترّان بیت، برے کوہلو ءُ کاہان ءُ برے ڈیرہ بُگٹی، برے جہلاوان، مکران ءُ برے کراچی۔ یک درویش ءُ مَلنگے ءِ پئیما گردان بیت ءُ پہ بلوچ آجوئی ءَ مردم درگیجیت۔

چے سردار، چے نواب، چے شاہ ءُ چے گدا، دہکان پُریاتگر، ماسٹر، ڈاکٹر، گوں زند ءِ ہر تک ءُ پہناتءَ سیادی داروک، کُلّان گوں نندیت بلوچ راجی جُنز ءِ تران ءَ کنت۔

    لس مُچّی،  سرکل، جلسہ، روانک، تبلیگ، ویڈیو، نوار، پہ بلوچ راجی جُنز ءِ ہاترا سیاست ءِ ہچ تک ءَ پشت نگیجیت۔ زات ءُ زریات، سیاہ ءُ اسپیت، دین ءُ مذہب ءِ پرک ءُ پئیراں ہاکاں ہوار کنت، شاہ ءُ گدا کُلّاں ہمراہداری ءِ سلاہ ءَ جنت۔

آئی ءِ ترانانی تہا انچیں سِہرے مان بیت کہ آئی ءِ گپّانی گوشدارگ ءَ مردم پہ آئی ءِ سوج داتگیں راہ ءَ لانکبند بنت۔

   آ بلوچ سرڈگار ءِ سرا پاکستان ءِ جوڑ کتگیں کلیں پندلاں مرزان کنت، بلوچ راجی جُنز ءِ مہکم کنگ ءِ ہاترا لیاری ءِ تہار ءُ تُرسناکیں دمکاں ترّیت، گُنڈہ ءُ موالیانی گورا بلوچ راجی جُنز ءِ پرچار ءَ کنت، آہاں چہ گُمراہیں راہاں کشّیت ءُ بلوچ راجی جُنز ءِ بہر جوڑ کنت۔ امین بادشاہ ببیت کہ رحمان بلوچ، ہر ہما بہادریں بلوچ کہ سرکار ءَ پہ رپک ءُ پندل چہ بلوچی ءَ کشِّتگ ءُ پہ بلوچ راج ءِ برباد کنگا کار گپتگ ات، شہید واجہ چئیر مین گلام مہمد ءَ پدا  اے بیگانگیں مہلوک ءَ گوں وتی پچیں رو ءُ شہدیں گپتار ءُ مہکمیں ارادہ ءَ بلوچ کنگ ءِ جہد کُت ءُ مزنیں کچّے ءَ سوبین ہم بوت۔

آئی ءَ بلوچ راجی جُنز ءَ چد ءُ گیش مہکم کنگ ءِ ہاترا بلوچ راج ءِ جتا جتائیں آجوئی لوٹوکیں گل ءُ پارٹیانی یک ہواریں گلے بلوچ نشنل فرنٹ ءِ نام ءَ ٹہینت۔ اے فرنٹ ءِ تہا راجی آجوئی لوٹوکیں سردار ءُ دگہ بازیں سیاسی پارٹیانی پجّیءَ بی ایس او آزاد ہم ہوار بیت۔

   اے مشکلیں سپر ءِ تہا، آ سرکاری پندلاں ہوار نادانیں دوست ءُ کستءُ کینگاں سرریچیں بدواہانی ہروڑیں تژن ءُ بہتاماں ایر بران کنت۔ بس بلوچ راجی جُنز ءَ وتی ایمان لیکیت ءُ شہیدانی کُربانی ءُ آہانی گُڈی منزل ءِ واباں وتی  چماں داریت۔ وہدے پاکستان گندیت کہ اے بُرز ءُ لاگریں مرد گوں سک تمردی ءَ منی مرگ ءِ ساماناں سرجم کنگا انت تہ آئی ءَ گوں آئی ءِ ہمراہ  شہید شیر مہمد ءَ آوار جنت ءُ بیگواہ کنت۔ آ چیریں زندانانی تہا ہر وڑیں ازاب ءِ دیمپان بیت۔ آئی ءَ را لب ءُ زند ءِ آسراتی دئیگ ءِ  کول کنگ بیت کہ ہمے راہ ءَ کہ تو درکپتگ ئے، چہ اشیءَ بیرو کن، ترا ہرچی لوٹیت ترا رسیت، اگاں نہ ما ترا کُشیں۔

   بلے آ نہ تہنا درستیں ازاب ءُ ازیتاں سگّیت بلکیں پاکستان ءِ کلیں لب ءُ ملام ہم آئی ءَ داشت نکننت۔ آ مرگ ءِ دیما چو بولان ءَ مِک بیت۔ یکے آئی ءِ تمردی ءُ دومی بلوچ راج ءِ نندانک ءُ روانکانی دست ءَ لاچار بیت ءُ چیئرمینءَ چہ چیریں زنداناں زاہر کنت ءُ چیزے وتگڑیں بہتام ئِے جنت ءُ یلہ کنت۔ پدا سرکار ءِ وتساچیں آمیدگسانی دیما پیشی ءُ پاشیاں رئوءُ آ ئِے پرمائیت۔ اے میان ءَ آئی ءَ پارٹی ءِ سنگت مجبور کننت کہ شہرءَ یل کن کوہ ءَ برئو، بلے آ ہچ وڑا رازی نبیت۔ گوں وتی پُرجزبگ ءُ مہکمیں ارادہاں پدا ماں بلوچ سر ڈگار ءِ پراہگاں، گوں وتی سیاسی تبلیگ ءَ ویل بیت۔ ہمے میان ءَ آمیدگساں وتی پیشیاں ہم رئوان کنت۔ آ چہ پاکستان ءِ وتسریں بہتاماں، چہ ہمائی ءِ جندءِ آمیدگساں آجو بیت۔ بس گُڈی  کیس ءِ پیشی ءِ ہاترا ماں کیچ ءَ وتی وکیل کچکول بلوچ ءِ کارگس ءَ گوں وتی سنگتاں نندوک بیت، 3 اپریل ءَ لالا منیر ءُ شیرمہمد ءِ ہمراہی ءَ یک برے پدا چست کنگ ءُ بیگواہ کنگ بیت۔ ششمی روچ ءَ 9 اپریل ءَ مرگاپ ءَ ہر سیہیناں شہید کننت ءُ لاشان اش چگل دئینت۔

پاکستان گوں وتی دلار ءُ بلوچیں گداراں دست ءَ سر ءِ چیرا کننت ءُ ایمن بنت کہ ما وتی مُسیبت چہ وتی سرا چوٹینتگ، نی بلوج راجی جُنز ہلاس بیت۔

 بلے گُشنت کہ شہید ءِ زند چہ شہید ءِ نمیران بوّگ ءَ رند بندات بیت۔

About Asa Bijjar

Leave a Reply

Your email address will not be published. Required fields are marked *