“و ڈائریئے سرجمێں تاک اِسپێت اسپێت اِتنت بس یک تاکێئے سرا نِبشته اَت: ”برے برے بے مکسدا اۆں بِکند”اے ملارئے بنداتی گپ اَنت بَله وهدے که آسرا رَسئے، ته الّم مُلورَ بئے، گرێوگیَ بئے، ترا سَما بیت که چیزے پَشت کپت، تئو جێڑئے که چُش چیا بوت؟ و پدا تئیی دلَ گوَشیت بکند، بے مکسدا بِکند…کمالانئے کارِست بێوَپا نهاَنت، رازدار اَنت، مُھکم اَنت، ھرکس وتی تها گۆن وتا جنگ کنگا اِنت بله اے وھد و مۆسمانی زۆراوری اِنت که رفیق نفسیاتی نادراهے جۆڑَ بیت، کۆٹیئے تها وتا بندَ کنت، همۆدا رَٹیت، گانا جَنت، گرێت، کَندیت. همے وڑا ڈاکٹر ناگمان که آییئے نفسیاتی ڈاکٹر بیت چه آییا سِشن گیپت و جُھدَ کنت که آییئے اِلاجا بکنت. رفیقئے اِلاج بیت یا نه، اِشیا شُما وت تامرئے چارگئے وھدا گِندێت…مَلارئے سبجِکٹ سرجما نۆک اِنت، چِد و پێسر بلۆچی تامرانی تها اے سبجِکٹئے سرا تُشے هم کار نبوتگ و چه اسکرپٹا پدّرَ بیت که کمالانا اے بُنگپئے سرا شئوکێں وڑێا ونتگ و ریسرچ کتگ. مئے کِرا، تامر جۆڑ کنگئے واستا وانَگ و ریسرچ کنگئے رئواجئے جند نێست، بله شئوکێں گپے که کمالان اے رئواجا دێما آرگا اِنت. مَلارئے تها سرجما تامُری رَنگ مان.

لایٹنگ: اے گپ په دِلجمی جَنگ بوتَ کنت که مَلارئے تها لایٹنگ باز وَشّ کارمرز کنگ بوتگ، چۆناها بلۆچیئے گێشتر تامراں لایٹنگ تهنا دێمئے رُژناییئے واستا کارمرز کنگَ بیت، بله ملارئے تها لایٹنگئے بُنیادی رهبند سرجما پوره کنگ بوتگاَنت، لایٹنگ سینانی موڑئے ھسابا دئیگ بوتگ. تامرئے تها باز جاگها لایٹنگ اَنچۆ داتگ که دێم آ پئیم زاهِرَ نبیت بله چارۆکا اَنچۆ سَما بیت که اِدا دێمارا اَسلا همے بئیگی اِنت، چه اِشیا پدّرَ بیت که لایٹنگ سینانی تَبئے هسابا دئیگ بوتگ

سینیمیٹوگرافی: همینچک که لایٹنگئے سرا کار بوتگ، دگه دو همینچک سینیمیٹوگرافیئے سرا کار کنگ بوتگ. سینانی کئیفیتئے هسابا کئیمره کار گِرگ بوتگ، چۆ که فلمئے تها کارستے چه سیڑیاں تَچگا اِنت، همے هسابا کئیمره هم جَمپ وران اِنت و سین شوٹ کنگ بوتگ. اِدا چارۆکا سما نبیت کئیمرهئے سرا چیزے شوٹ کنگ بوتگ، پورا اسلیا یکے سیڑیانی سرا تَچگا اِنت و کئیمرها گپتگ. دگه جاگهے رفیق و سَمی هۆٹلێا نَشتگاَنت، هامۆشیئے کئیفیتے و همے هسابا کئیمره هم یکّێں جاگها گۆں اَنچێں کئیفیتێا اِیر اِنت. بلۆچی تامرانی تها اے رَنگێں سینیمیٹوگرافی سک کم کَنگ بوتگ.

 ڈاریکشن: ڈاریکشن دئیگا وه کمالانا کمال کتگ. کارست اَنچۆ کار گِرگ بوتگاَنت که تئو نزانئے که ادارکاری کنگا اَنت، پوره اَسلی ماهۆلے مهسوسَ بیت: عومر، راشد، رفیق اے وه باز سنیئرێں اِزمکار اَنت بله تامُر که چه کێچا دَر کئیت و رئوت یونیورسٹیێا که اۆدے دْراھێں اِزمکار ھمۆدئے نۆدربر اَنت که آیاں اِزمکاریئے ھچ تجربه نێست، ھمایاں هم کمالئے اِزمکاری کتگ، ھمے ملارئے زێبائی اِنت. دومی ڈایلاگانی ادایگی سینانی تَبئے هسابا بوتگاَنت. مئے گێشتر فلماں ڈایلاگ اَنچۆ اَدا کنگ بنت که کارست کوکار کنگا اَنت. ترا سما بیت که اے مردم که کئیمرهئے دێما اۆشتاتگ و اے پئیما گَپّا اِنت، مردم آم سورتا اے پئیم گَپ نکنت… بله مَلارا که تئو چار ئے، ترا هچ جاگه سَما نبیت که کارست کئیمرهئے دێما آرگ و گُشگ بوتگ که اے پئیم بکن. اَنچۆ مارئے پوره درستێں کارست اَسلا همے وڑ اَنت. اے کمالانئے direction ئے کَمال اِنت.

ملارئے چارگا پد اے گَپا گۆں دِلجمیا گوشت کناں که بلۆچی فلم انڈسٹریا فلمی رَهبندانی سرا جۆڑ بوتگێں تامر هست و مَلار هر وھد و مۆسمئے چارۆکاں ملار کنان، وتا چارۆکانی دِلاں جاگه دئیان کَنت. چیا که مَلارئے کِسه تهنا رفیقئے کسه نهاِنت، اے مئے چپ و چاگِردئے مردمانی کِسه اِنت.
کسّه، ھبر، سۆجکار: کمالان بیبگر
اِزمکار: عومر کیّا، رفیق گُل، رابیا، راشد حسن و محراب خالد
کمکسۆجکار و لایٹنگ: ولید واھگ
تئوارانی گِرۆک: محراب خالد و زھیر شاد
تامُر بند، بتکار، ردکار: کمالان بیبگر