من دل ءِ سوک ءَ لہتیں گپ نبشتہ کتگ ات۔ یکے مں اے گُشتگ ات کہ بلوچاں گوں پاکستان ءَ جنگ ویل کتگ ءُ وت ماں وتا پیڑِتگ انت۔ دومی ایش کہ سلاہ بندیں بلوچ برے عام بلوچے ءِ گاڑی یے پچ گِرنت ءُ برے یکے آوار جننت ءُ چرائی ءِ سیاداں زر لوٹنت۔ نبشتانک ءِ شنگ بوگ ءَ رند سنگتے ءَ منا گُشت کہ لہتیں دمگاں شوانگانی پَساں ہم برنت اگں آ روچ ءَ دل اش سجّی بہ لوٹیت۔
پرے گپّاں لہتیں سیاسی گلانی مردماں منا سرا زُرت۔ یکے گشیت کہ تو مہلوکات ءَ دلپروش کنئے ءُ دگرے گُشیت تئی ہبر راست انت بلے اے وہد نہ انت چُشیں گپّانی کنگ ءِ۔
مہلوکات ءِ دلپروشی ءِ ہبر گوْستہ۔ آ پہ دپ ءِ ہبرے ءَ اگں دلپروش بوتین انت ڈاکٹر مالک ءَ وتی کار دیری کتگ ات۔ اگں مہلوکات دلپروش بیت پہ آجوئی دوستانی بے سریں کاراں، پہ برادرکُشی۔ منی نبشتانک ءِ مکسد ہم ہمیش ات کہ اگں مردماں دلپروش کنگ نہ لوٹئے بے سَریں کارانی سرا بہ گرئے۔
چوناہا اسلام ءُ پاکستان ءِ وڑا بلوچ ءِ جُنز پہ دپ ءِ ہبرے ءَ لپرزگ انت۔ سیاست ءِ تہا نزوری بنت، نزوریانی نشاندہی بیت، نزوری شر کنگ بنت۔ مہکمیں جُنز پہ ایرادے ءَ ہلاس نہ بنت، مہکم تر بنت۔
وتی نبشتانک ءِ تہا من اے ہبر ہم کتگ ات کہ اللہ نزر ءُ ہیربیار ءِ تہا اے بود مان انت کہ آ چیزاں گہتر کُت کننت۔ ہیربیار ءَ جنگے بندات کُت، دنیا ءِ سلاہ آورت ءُ نوک ورناہانی تہا بہر کتنت، نوں لندن ءَ بنگلہ یے ءِ تہا نشتہ کہ ناں مں کسے گنداں ءُ ناں گوں کسے ترانے کناں۔ برے برے بیانے دنت۔
پہ بیان ءِ دیگ ءَ اتحاد نہ بیت۔ پریشی ءَ آئی ءَ گوں بلوچ جنز ءِ درستیں سروکاں نندگ ءُ ہبر کنگ لوٹیت۔ مردم وشّان کنگ لوٹنت۔ آئی ءِ بہر کُتگیں سلاہانی وجہ ءَ بازیں بلوچے ءَ وتا کوشارینتگ، بازینے ءِ دنیگہ نام ءُ نشان گار انت۔ گوں سیاسی مردماں نند ءُ نیاد ءَ آئی ءِ پونز کستر نہ بیت۔ اگں بیت ہم پہ بلوچ جنز ءِ دیما برگ ءَ اے مزنیں قربانی یے نہ انت۔
دنیگہ مردم ہیربیار ءَ چہ یپّارگی دلپروش نہ انت۔ انگہ لہتیں انچیں مردم است کہ چرائی ہمے اوست ءَ داریت کہ ہیربیار وتی کینگ ءَ کوتاہ کنت ءُ ہم پکریں سیاسی سروکانی ہمرائی ءَ اتحاد ءِ راہ ءُ دراں پچ کنگا کُمک کنت۔ آئی ءَ پرے زوتاں ہمے بیان کہ اتحاد ءِ سرا داتگ، مردماں وش اتک کتگ۔ آئی ءِ بیان ءِ جواب ءَ بی۔این۔ایم ءِ حمل حیدر ءَ شرتریں بیانے داتگ ءُ ہیربیار ءَ را اے مستری بکشاتگ کہ تو جاگہ ءُ وہد ءَ بہ گیشین، پہ اتحاد ءَ ما نندگ ءُ ہبر کنگا ساڑی ایں۔ بائد انت ہیربیار ہمے گپ ءَ دیما بہ بارت ءُ ہمے مستری ءَ بہ زوریت۔
اللہ نزر مردماں دوست بیت ءُ سک دوست بیت۔ آئی ءِ سیاسی مخالفانی ہبر وتی جاگہ ءَ بلے عام بلوچ چرائی ءَ مزنیں گتے گیپت۔ گریبیں مردمے، پمیشکا گریبیں بلوچ سرپد بنت اگں آہانی جیڑہ ءَ یکے زانت ہمے مرد انت۔ بلے اللہ نزر ءِ سر ءِ کیمت گیش بوان انت۔ پیسرا سرکار ءَ دہ لکھ ایر کتگ، نوں پنجاہ لکھ ئےِ کُتگ۔ سرکار ءِ پوج چو ہڑکّہی کچک ءَ آئی ءِ سرا انت۔ کجام روچے شوم بیت کس نزانت۔ بائد آ وتی زند ءَ بلوچ جُنز ءِ کوتائیاں یک یک ءَ گران بہ کنت۔
من نہ گُشاں اللہ نزر ءُ ہیربیار ءُ براہندگ اگں اتحاد بہ کننت بلوچانی درستیں جیڑہ ہلاس بنت۔ من اے ہم نہ گُشاں کہ اے مردم ہم دل ءُ ہم سِتک بہ بنت ءُ یک پارٹی ءِ تہا بہ نندنت۔ چوش بوت نہ کنت۔ بلے بائد انت اے وتی زور ءَ یکے دومی ءِ ہلاپ ءَ ناں بلکیں بلوچ راج ءِ رکّینگ ءِ واستا کار بہ بند انت۔
یک کمیٹی یے جوڑ کنگ بہ بیت کہ آئی ءِ تہا درستیں گلانی یک یکے جہگیرے مان بہ بیت۔ وت ماں وتی جیڑہ ہمے کمیٹی ءِ تہا گیش ءُ گیوار کنگ بہ بنت۔ دنیا ءِ دیما ہمے کمیٹی وتی گپ ءَ یکے بہ کنت ءُ دیما بیارت۔ اے چُشیں پد نہ بودیں کارے نہ انت کہ بوت مہ کنت۔ اگں چوش بوت بزاں بلوچ ءِ جنگ دنیگہ ہلاس نہ انت۔
Sajid Hussain (1981-2020) was a writer and senior journalist from Balochistan. He had a degree in Economics, International Relations and English Literature from Karachi University. He had the experience of working with Pakistani newspapers Daily Times and The News International. Sajid Hussain was also the founding editor of this online magazine.
