گُرک که ھالءَ گِپت که جنگلءِ لهتێں جانورءَ جنگلءِ سرا لجوزءِ ناجائز کبزهءِ هلاپءَ ”جنگل جُنز“ نامێں پارٹییے ٹهێنتگ، سَکّ گَل بوت. گُرکءَ زانت که جنگل همێشانی اِنت، ءُ لجوزءَ په زۆر گِپتگ، ءُ هما اِنت جنگلءِ جانورانی زندگی اَزابے، گُرکءِ هم. گُرک چۆناهیا لجوزءِ تاچێنگءِ راه ءُ دَرےءِ سْراپءَ اَت. نوں اے ھالءَ که سهی بوت، گَل بوت ءُ در کپت ھمێشانی نێمگا. گَردان ءُ ھۆنڈاں سَر کشّاں بوت. تُرسگا اَت ھم، که اگں لجوز سهی بوت، منا انچۆ چِلّێنیت که کَسّ منی جۆنءَ پجّاه نئیاریت. بلے دگه راه نێستاَت. تُرسئےِ دلءَ داشت، رۆچ ءُ شپ جنگل جُنزءِ سنگتانی شۆهازءَ سَر جناں بوت.
بیستمی رۆچءَ گۆں رۆباءَ دپ کپت. دو رۆچءَ رۆباءِ مھماں بوت. بازێں لبجگےءَ پد زانتئےِ که رۆبا هم ھمے ٹۆلیءِ سنگتے. رۆبائےِ رازدار کت. اے دگه رۆچءَ رۆباءَ گُرک زُرت ءُ پارٹیءِ سرۆک (تۆلگ)ءِ شُت. تۆلگءِ وتی زمّهداری اِش اَت که مگربءَ پد وت ءُ ھۆنڈءِ اے دگه سجّهێں جانو هۆریگا بکلونزنت ءُ لجوزءَ وابءَ مئیلنت. تۆلگءَ پارٹیءِ رھبند گیشّێنتگاَتنت. چۆ که اے چێرێں کارے، پمێشکا پارٹیءِ رازانی اَمانتداریءِ هَلف ءُ سئوگندءَ رَند گُرک ھۆنڈےءَ دێم دئیَگ بوت. اے هۆنڈءَ پنچ دگه جانور هستاَت. اِشانی زمّهداری لجوزءِ نِزۆریانی در گێجگ اَت ءُ دگه کارے اِش اَت که ھپتگے یکّ رندے جنگلءِ زِرباری نێمگءِ کؤرجۆءَ برئونت. اۆدا هر جانورے که آپا کئیت، گۆں آئیءَ نَزّیکی بکننت ءُ گپّ گپّا لجوزءِ زۆراکیانی بابتا آیاں سرپدی بدئینت.
ماهے یکّ رندے تۆلگءِ گْورا (چێرێں گارےءَ) پارٹیءِ میٹنگ بوت. گُرک، پُلنگ، پیشّی، رۆبا، کُچکّ ءُ مزار نِشتنت ءُ ماهءِ دراهێں کارانی سرا چمشانکِش دات، دێمتری کارانی بهسِش کت.
وھد گْوزاں بوت، گُرک ءُ همراه وتی کاراں مُشکول اَتنت. گْوربامےءَ گُرک که چه وابءَ پاد اَتک، دیستئےِ پُلنگ گار اِنت. آ دگه جانورئےِ پاد کتنت. دراهێں جنگلِش پیشّ پیشّ کت، پُلنگ گِندگ نبیت. واپس ھۆنڈءَ رئوَگا اَتنت، گِندنت تۆلگ نِشتگ. اِشان کماش ھال دات، کَماشءَ گُشت پُلنگ من چه جنگلءَ در کُتگ. سئوَب؟ سؤگندئےِ پْرۆشتگ، اسولانی هلاپوَرزیئےِ کتگ. دگه کَمّے وھد گْوست ءُ مزار چه ھۆنڈءَ گار بوت. همے یکّێں جُرمءَ. گُرک نوں زانَگا اَت که تۆلگ ٹَگّی کنگا اِنت. تۆلگءِ تُرس اِش اِنت که یکّے منی لیڈریءَ بارت، پمێشکا یکّ یکّءَ سجّهێناں در کنان اِنت. دگه لهتێں رۆچءَ پد پیشّی گار بوت، پدا رۆبا. گُرک اے دوئێنانی گاریءَ سهی هم نبوت. کُچکّءَ اے ھۆنڈ یله دات ءُ تۆلگءِ ھۆنڈءَ شُت ءُ نِشت گۆں. اِدا تهنا گُرک پَشت کپت.
ماھے کپّےءَ پد گُرک پدا ھالےءَ گِپت. لجوزءِ ھلاپءَ جنگلءَ دگه پارٹییے جۆڑ بوتگ، نام اِنتئےِ ”جنگل مئیگ اِنت“.
گُرک نوں دێر اِنت چه ھۆنڈءَ دَر اَتکگ. کۆهےءِ ٹُلّءَ نِشتگ، جێڑگا اِنت که ”جنگل مئیگ اِنت“ءِ آسر ”جنگل جُنز“ءِ وڑا بیت یا نه؟
