آ هر سُهب وتی بیگءَ زوریت، رئوت بازارءِ چارراهءِ سرا. رَش کَشّ اِنت. مردم مهله پاد کاینت.
آ وتی پَشکءَ کَشّیت، یَکّ یکّءَ شهرءِ دراهیں ڈونڈوار آئیءِ سرا پِر رچان کننت. آئیءِ گوشتاں ورَنت. مردم چاپ جننت، سیلفی کَشّنت. آئیءِ دیمءِ ایریں کُلاهءَ زَرّ مان کننت. آ هر بیگاه هون ءُ هونریچ، کُلاهءَ زوریت لوگءَ رئوت.
دومی روچءَ دگه چارراهےءِ سرا رئوت. پدا پَشکءَ کَشّیت. سرجمیں ڈونڈوار آئیءِ جانءَ ورنت۔ مردم ھیرانیءَ آئیءَ چارنت، گَل بنت. چُکّ چه گَلءَ ناچ کننت۔ یَک روچے چارراهےءَ رئوت، دراهیں سیاھیں ڈونڈوار آ ئیءِ دست ءُ پادانی گوشتاں اَنچو ورَنت که آئیءِ ھَڈّ دَرا بنت۔ همیشانی نیامءَ یَک اِسپیتیں مُرگے کئیت ءُ آئیءِ چپّیں چمّءَ ٹُک جنت ءُ وارت. ائولسرا چمّءِ سْیاھگءَ، ءُ پدا اِسپیدگءَ. همے پئیما آئیءِ راستیں چمّءَ هم ٹُک جَنانا وارت۔ آ سرسَر جنان بیت، دزموش کنان بیت، لوگءَ رئوت.
سرجمیں شپءَ لیلُک آئیءِ چُنڈ چُنڈیں جسمءَ ورنت۔ نوں آئیءَ بے اِشاں آرام نئییت۔ سُهبءَ پاد کئیت، آئیءِ چمّ ءُ آزگیں ٹَپّ پدا وَشّ اَنت. آ جان شودیت، وتی جانءِ لیلُکاں دور کنت۔ پدا رئوت بازارءِ چارراهءَ۔ نوں ڈونڈواراں آدَت کتگ. آئیءِ پَشکءِ کشّگا ساری دراهیں مُرگ ئےِ پِر رِچنت. آئیءِ سرجمیں بالاد چُنڈ چُند، آزگ بیت. لیلُک آئیءِ رِتکگیں هونانی ورگا کاینت. مردمانی جَهکا جیکّ اِنت. مردم لوٹنت آئیءَ زَرّ به دئینت، بلے مرچی آئیءَ وتی کُلاه نئیاورتگ گوں. اے دراهیں ڈونڈوارانی نیامءَ آ اِسپیتیں مُرگءِ ودارا اِنت۔
Shehzad Obaid teaches English literature at the University of Balochistan. He completed his masters research in "Dystopian Literature," focusing on the themes of 'Control' and 'Resistance' in contemporary literature. He writes dystopian short stories and creates educational videos in Balochi.
