من ماشٹر
سہبءَ کلاسءَ جند ءِ بُنگپ ءِ ہمراہ
بھگوت گیتا
یونانی متھ
سقراط ءَ گِر داں نطشےءَ
چینچو رنگ ءَ مَٹّ حُدا بنت
چینچو رنگ ءَ ما انسان
شَرءُ گَندگ، نیکءُ بدیاں
وانیناں باں
بورڈ ءِ بدلءَ
دراہیں حرفاں پیشانیءَ لِکّاں باں
کُلّیں کلاسءِ وانوکاں چہ بَس یَکّے
یکیں گپءَ ہر رو دیما جَنت منی
سر، تو ہرچی وانینئے ہچ فہمءَ نئیت
من چہ کلاسءَ درکایاں
بیگہ کہ بیت
شہر توامیں
پرُشت ءُ پروشیں ساماناں
آکوٹانی اَزباباں
کوَہنءُ کَلَنڈیں اَلماریاں
بیماریاں
بَڈّء من چو لیڑہءَ سَربار کناں
دراجیں صلیبءِ کَل کنگءَ رَند
میہاں زُورنت ٹُکّنت دستءُ پاداں
منی
کُل کہ جُنزَنت
یک آوازے تہنا گوشاں کئیت منی
۔”مَرگ بباتیں
کَہبہ ء سُوَّر
“گیتا میتا وانینیت
Qasum Faráz is an important name in modern Balochi poetry. He has published two poetry collections so far. He has a Masters degree in English Literature and is teaching English at the Balochistan Residential College Turbat, Balochistan.
