انتھون چیخوف ءِ آزمانک ”فیٹ اینڈ تھِن“ ءِ بلوچی بَدل (ایڈاپٹیشن)۔
لوکل ءَ نوکی داشتگ اَت۔ لاگریں مردے گوں وتی لوگی ءُ بَچک ءَ اِیراَتکگ اَت ءُ دَنزاں چَنڈگا اَت۔ جان ءَ پُرّیں مردے ءَ چہ اِسٹاپ ءِ ہوٹل ءَ نان وارتگ اَت ءُ دَراہگا اَت۔
۔” سوالی”۔
توارے ءَ لاگریں مرد گُڑینت۔
جان ءَ پُرّیں مرد ءَ گوں لاگریں مرد ءِ گِندگا توار پِر دَات۔
۔”اڈئے پیر مہمد! رَپتگیں مرد توچہ کُجا؟” لاگَریں مرد ءَ جان ءَ پُرّیں مرد گُلائیش کُت۔
۔”حدائی اِں منا باور نہ بوہگا اِں کہ تو چو ڈِیک دَئے۔ چُنت سال اِں ترا ندیستہ۔” لاگریں مرد یَکّیں گین ءَ ہبرءَ اَت۔
۔”زباد بیا ناکو ءِ کِرّا دُو،“ لاگریں مرد ءَ بَچک توار جَت۔
.زَباد اَتک ءُ لاگریں مرد ءِ پُشت ءَ اوشتات۔ ”منی بَچک ایں۔ سہمی ءَ وانگا اِں ماشاء اللہ۔ ءُ آ تئی نِشار اِں۔ بیا جَنئے!“ لاگریں مرد ءَ لوگی توار جَت
لوگی ءَ زمین ءَ اِیریں ڈَک چِست کُت ءُ اَتک زباد ءِ کَش ءَ اوشتات۔
پیر مہمد اِسکول ءَ منی ہمسَبک بوتگ۔ منی دوستگیں ءُ نزیکتریں سَنگت،“ لاگریں مرد وتی لوگی ءَ گُشگا اَت۔”.
۔”ما دوئیں اسکول ءَ جُٹ بوتگیں۔ہروہدءَ ہور۔ ہرچ کارءَ ہمراہ۔ بَچکّاں شیتانی ءَ مارءَ جاڈُک گُشتگ “۔
۔”دِگہ ہال کن چونئے تو،“ لاگریں مردءَ دم ءِ بال ءَ کنگ ءِ ہاترا کمّے بَس کُت گڑا جان ءَ پُرّیں مرد ءَ جُست کُت۔
۔”من برابر آں۔ مجسٹریٹ ءِ نائب قاصد اں۔ پَگار کم اِں بلئے کَش ءُ کِرّا رسیت گوں۔ تئی نِشار گُد دوچی کنت، چیزوکے چمودا رسیت۔ دو پکّائیں کوٹی بستہ، اَتکگاں سامان مامان ءِ چارگ ءَ۔ تو ہال کن؟۔۔نوکری موکری یے گپتہ اگاں ناں”؟ لاگریں مرد ءَ وتی پُشت ءُ دیم ءِ کِسّہ آؤرت اَنت ءُ جان ءَ پُرّیں مرد ءِ جواب ءِ گوشدارگا جاڈیگ بوت۔
۔”من شُکراں۔ تحصیلداری ءَ اَں۔ دگہ ہاسیں ہچ نیست”۔ جان ءَ پُرّیں مرد ءَ گوں بچکندگے جُست جواب کُت۔
جان ءَ پُرّیں مرد ءِ جواب ءِ اِش کنگا گوں لاگریں مرد ءِ دیم یکبرے سیاہ تَر اِت۔ دَمان ءَ وتا ٹہینت ئےِ۔ دَپ ئےِ اَنچو پُچ کُت گشئے چرائی ءَ گَل تِریں مردم اے ساہت ءَ زمین ءِ سرا نیست اَت۔ لاگریں مرد ءِ لوگیءَ گُشان چہ سر ءِ نیما کَش اِت ءُ پیشانی ءَ آؤرت۔ زبادءَ لانتگیں آستونک تچک کُتنت ءُ بٹن ءَ شوہازگا بوت۔
۔”سَر۔“ لاگریں مرد ءَ گوں دوئیں دَستاں جان ءَ پُرّیں مرد ءِ راستیں پَنجگ کَبُند کُت۔
۔”سر،اللہ ترا ہمے روچاں کنات۔چِد ءُ گیشتر ترقّی کنات ئے۔” لاگریں مرد ءَ جان ءَ پُرّیں مرد ءِ پَنجّگ یلہ دات ءُ دوئیں دَست دیما بَست اَنت۔
۔”چو چیا کنئگا ئے؟کار ءُ روزگار وتی جاگہ ءَ ، من ءُ تو سنگت ایں”۔ جان ءَ پُرّیں مرد ءَ لاگریں مرد ءِ دَستانی بندگ ءُ چو دمان ءَ مَٹ بوہگ وَش نہ بوت۔
۔”ناں سر! تو منی واجہ ئے،“ لاگریں مرد لَرزگا اَت۔
۔”اے ۔۔ اے منی لوگی اں ۔۔ اے منی بَچک اِں” لاگریں مرد ءِ دَپ چہ کندگا پُر اَت ءُ جان ئےِ لَرزگا اَت۔
جان ءَ پُرّیں مرد چہ لاگریں مرد ءِ زوریں بچکندگ ءُ سر سر جنئگ ءَ بے وار اَت۔۔ یک ءُ دو رَند ءَ جہد ئےِ کُت کہ لاگریں مرد مردم ءِ وَڈا بہ بیت بلئے وہدے چاراِت ئےِ کہ لاگریں مرد نوں ہمے وَڈ ءَ اِنت کہ آئی ءِ دَستاں بہ چُکّیت ءُ پاداں بہ کپیت، جانءَ پُرّیں مرد ءَ دَست لاگریں مرد ءِ بَڈّا جَت ءُ اِجازت کُت۔ لاگریں مرد، آئی ءِ لوگی ءُ بچک یک رِد ءَ اوشتاتگ اَتنت، جان ءَ پُرّیں مرد ءَ چارگا اَتنت۔
Seth Halir is a UAE-based Balochi writer. He mainly writes short, satirical pieces. He also edits and shoots Balochi films.
