من، تئو، شپ، ماه، تھنایی و ماھکانی… مھرئے پُلدانا انچۆ کماتگاتێں که پوره دنیا ھمے پُلدانئے تها سرجم اَت. من ترا چارگا اتاں و شپ ماها، و تھنایی ماھکانیا.
ھر یکّێا دومی وتی امبازاں زُرت و لزّتانی کئیپ سَررێچ اَت و خُمار ھمینچک ودِّتگات که پُل و وشبۆ په آتاریا سِدگا نهاِتنت. پُلّا وشبۆ یل دات نکت و من ترا… ماها شپئے سرونا وتی سر اێر کتگ و مھکانیا تھناییئے زانسراں… درست چۆ کماتگێں پُلّا ھمگرنچ اتنت و یکے دومیئے ندارگا چارگا اتنت.تئو منی چَمّانی زِرا بُکِّتگ ات و اۆژناگا اتئے و من تئیی لنٹانی ھۆشامئے کدّها.
تئیی مھرانی بھشتا منی دنیا سرجم کتگاَت و من و تئو دگه جھانێا نێمبال اتێں. و اے سپر انگت ھلاس نهاَت و تئو منا گۆں تُنّیگێں نگاھێا چارگ و گوَشگا اتئے که تئو منا یل ندئیئے؟
ھمے دمانا من وتی سر تئیی سرئے نزیکا آورت، تئیی پێشانی چُکِّت و تئیی دێمئے نِوانا گۆں ترا هۆر ساه کشّگا اتاں که منی و تئیی دَم انچۆ ھئوار بئیگا اتنت که تئو منی ساها وتی نێمگا کشّگا اتئے و من تئیی ارواها امبازگ و گوَشگا اتاں، ارواه چه جانا در آتک کنت، پُلّ وشبۆا درۆهِت کنت، چاردھی شپاں ماه مھکان ھم مبیت، کَلێر تاک برۆدێننت و گزّاں کُنٹگ ھم پر ببیت، بالی مرگاں چه شیر در بیئیت، زمین و آزمان چیر و سر ببنت، ھرچی بوتَ کنت بله من بے ترا بوتَ نکناں.
تئو منا گێش امبازاں پْرِتک و سارتێں آھے کشِّت. ھما اِنت که منی ارواه گۆں ترا انگت بال اِنت، دم نبارت، دم نکنت و مھرانی آزمانا سئیلا اِنت.
Husna Ishaq is a student of Pharmacy at the University of Balochistan, Quetta. She is from Kech.
