دنیاءِ تہا بے کساس گل انسانی ہکانی ہاترا کارکنگا انت۔
دومی جہانی جنگءَ پد، انسانءَ را چہ مزنیں جَنگءُ جدلاں رَکّینگءِ واستا، انسانی ہکانی پہازگ یک بُنیادی کارے زانگ بوت۔ وہدے یو۔ این۔ او جوڑ کنگ بوت تہ اِشی ءِ رہبندءِ تہا انسانی ہکانی پہازگءِ ہاترا انسانی عزتءُ شرف، آجوئی، فکرءُ لیکہءِ ہمراہیءَ اے ہبر ہم گیشینگ بوت کہ اے درہیں بُنیادی ہک، پہ جنینءُ مَردینءَ یک ہسابءَ برابر اَنت۔
یو۔این ءُ پاکستان پُشت ماں پُشت ءَ جوڑ بنت، یک سالےءِ پَرک اِنت۔ یو۔این کہ انسانی ہکانی جہانی جارنامگءَ دیما کاریت، کہ یونیوَرسل ڈیکلریشن آف ہیومن رائٹس گُشگ بیت، تہ آئی ءِ جنرل اسمبلیءِ تہا درہیں ملک اشیءَ مَنّنت۔ اے منّوکانی تہا پاکستان ہم ہوار بیت۔
یونیورسل ڈیکلریشن آف ہیومن رائٹسءَ رَند بازیں چشیں جارنامگ اتکگ کہ یو۔اینءِ باسکیں ملکاں اے کنونشن دستخط کتگ اَنت، مَنّتگ اَنت،ءُ چہ اشاں بازینے وتی ملکءِ آئینءِ تہا ہم ہوار کتگ۔ اے رَندتِری کنونشن گیشتر یک نہ یک خاصیں نُکتہےءِ سرا بوتگ اَنت، چو کہ جنینانی لَٹءُ کُٹ کنگءِ ہلاپءَ، چُکءُ گوَنڈوآنی ہَکّ، معزوریں مردمانی ہَکءُ دگہ بازیں۔
اے گپ ہم گیشینگ بوت کہ جنگےءِ تہا جنینءُ زالبولانی جَنَگ یا دگہ تاوانے دیگ مَبیت۔ پاکستانءَ ہم اے گپ مَنّ اِت کہ جنگءُ جدلءِ حالتاں جنینءُ چُک ہچ رنگءَ تاوان دیگی نہ اَنت۔ انچو ہم جنینءِ لٹءُ کُٹ کنگءِ ہلاپءَ پاکستانءَ وتی آئینءِ تہا کانون جوڑ کت کہ دنیگہ ہست اَنت۔
بلے پاکستانءَ گوں بنگالی زالبولاں ہما کار کتگ اَنت کہ دنیاءِ ہچ زوراکءَ نکتگ۔ اے رنگءَ بنگلہ دیشءُ بلوچستانءَ، پاکستان وت وتی کانونءِ چَپءَ شتگ۔
بنگلہ دیشءَ، پاکستانی فوجءَ ہزاراں جنیں آدم زِنا کت، آزہ بُرّ اِتءُ چگل دات اَنت یا کہ آہانی لاش گیابانءُ زِرلمباں بے پردگ کتءُ دور دات اَنت۔
اے گپ دنیگہ زانگ نبیت کہ پاکستانی فوجءِ کتگیں زناءِ آسرءَ بنگلہ دیشءَ پیدا بوتگیں کوٹکیں چُک چینکس اَنت۔
انسان دوستءُ زالبولانی سرا کار کنوکیں گلانی بے تواریءِ سوبءَ مروچی بلوچستان ہم بنگلہ دیشءِ رنگءُ دروشمءَ جنت۔ پاکستانءِ فوج، ہمک روچ بلوچ ورناءَ ابید زالبول ہم چِست کنگا اِنت۔ ہما جاگہاں کہ فوج بمباری کنگا اِنت، میتگاں سوچگا اِنت، آ جاگہءُ میتگاں بازیں جنیں آدمے کُشگ بوگا اِنتءُ بازیں جنیں آدمے چِست کنگءُ برگ بوگءَ اِنت۔
بمباریءَ ابید پاکستانی فوجءَ بازیں زالبولے پہ زانت، نشانگ کتگءُ جتگ ہم۔ بانک شہنازءُ بانک حلیمہ اے گپءِ مزنیں مسال اَنت۔
بلیدهءَ بی بی فاطمهءِ لوگءَ مارٹر گولہ جنَگ بیتءُ بی بی زدگ بوگا پد شہید بیت۔
ہمے رنگءَ مشکےءَ چہ یکیں لوگءَ سرجمیں لوگءِ زہگءُ زال چست کنگ بنت۔ ہمے زالبول پدا یک لوگےءَ دارگءُ گُلامءِ رنگءَ کار بندگ بنت، چہ ہمے یکیں لوگءَ کہ کیمپ جوڑ کنگ بوتہ، کَسءَ درآہگءِ اجازت نیست، چاریں نیمگاں تُپنگیانی ہسار اِنت۔ شَش اپریل 2018 ءَ چہ ہمے زالبولاں یکے تہنا اے واستا بیران بیت کہ جند نادراہ، لَٹءُ کُٹانی چیرا بیت۔
بلوچ زالبولانءَ روچ پہ روچ گیش اے جنگءِ تہا دور دیگ بوگا اِنت، پاکستانءِ ریاست وتی کانوناں ہم پروشان اِنتءُ ہما کَنوِنشناں ہم کہ جہانءِ دیما مَنّ اِتگءُ دستخط ئِے کتگ اَنت۔
کُہتءُ دَرد گیشتر اے گپءِ سرا بیت کہ دُنیا،ءُ خاص ہما مردمءُ ادارہ اے بلاہیں جبرءِ دیما ہاموش اَنت کہ چوناہا دنیاءِ تہا انسانی ہَکءُ خاص جنیانی ہکانی پاسبان اَنت۔ تُری پاکستانءِ تہا موجودیں این جی اوءُ ادارہ ببنت یا دری جہانءَ، اے درہینانی کار ہمیش اِنت کہ جنینانی سرا بووکیں جبرءِ ہلاپءَ وتی آوازءَ چِست بکننت۔ اگاں بلوچ جنینانی جیڑہءِ سرا ہاموش بنت، تہ اسلءَ آ ہم وتی جندءِ وجودءَ ہما رنگءَ مشکوک کنگا اَنت، ہما رنگءَ کہ پاکستان گوں وتی جبراں، وتی جندءِ آئینءَ پروشگا اِنتءُ وتی آئینی وجودءَ مشکوک کنگا اِنت۔
