برے برے مردم انچو شاعرانہ چاڑےءِ تہا گشنت کہ بس یات پشت کپنت۔ چونہا، گپ راستے ہم۔ انسانءِ زند یاتءُ تجربہانی گرنچے ءُ ہمے یات ءُ تجربہ انسان ءِ ہست ءَ، آئی ءِ انوگیں وہدا مانا دیگ ءَ کمک کننت۔
اگں یکے ءَ ھرچی کہ اِشکُتہ، ہرچی کہ دَر بُرتہ، ہرچی کہ یاد کُتہ، سجّہیناں سرجمءَ بیہال بکنت، تہ آ چوں وتا انسانے گشیت، چوں وتی جندءَ مانا دنت؟ پمیشکا منی نِزّءَ بوت کنت اے جارءِ جنگءَ مردم سرجمءَ رد مبیت کہ اِنسان کسّہی جانورے ءُ آئی ءِ کسّہءِ روتگ، آئی ءِ گوستءِ سینگءَ سَک انت۔
زندگی، منی چَمّاں، دیما روَگءِ عملے، نوکیں راہءُ رنگانی درگیجگ ءِ سفرے۔ بلے انسانءِ اے سفرءِ مستریں توشگ، انسانءِ گوَست، بِزاں تاریخ اِنت۔ انسان، اے کِسّہاں کہ وتءَ گُشیت، چوناہا اے درُست راست ھم نہ اَنت۔ بلے اے وڑے نہ وڑےءَ پہ آئیءِ زندءَ ہَمدابیءُ ہم آہنگی یے کارنت۔ ہمے کِسّہ چاگردےءِ، قومےءِ، مزہبےءِ اوں بوت کَننتءُ فردےءِ ہم۔ بلے نوں جیڑہ اِش اِنت کہ اے کِسّہ، مِتھ یا داستانی ہم بوت کَننتءُ راستیں ہم۔ انسان باز وہدا اَنچیں ہَبر یا کِسّہ باور کَنت کہ آ راست نہ اَنت، بلے آہانی تہا یک اَنچیں فیکشنَل خوبصورتی یے ہست کہ انسان، آئیءَ گوں وتءَ ہَمگرَنچ کَنت یا آئیءَ چہ کسانیءَ ہمے کِسّہ ہمینچو رندا گُشگ بوتگ اَنت کہ آ آہانی سرا بے سوال ءَ باور کنت۔ بلے نوکیں وہدءِ انسان وتی راستیں کسّہءَ زانگ لوٹیت۔ ہمے راستیں کِسّہءِ شوہازءَ چاگردی سائنس رُدوم داتگ اَنت کہ اے علمانی تہا یکے تاریخ اِنت۔
علمء تاریخ یا دپترنویسی ءِ وتی کاررَہبنَدے، کہ اے مارا تاریخءَ را گوں تنقیدی نگاہاں وانگءَ ہم مَدَت دَنتءُ نبشتہ کنگا ہم۔
ہمے کِسّہ کہ تو وتءَ فَردی، سماجی، قومی، مذہبی یا دگہ صورتےءَ گُشتہ، یا ترا گُشگ بوتہءُ تو باور کتگ اَنت، بیا آہاں نوں تاریخءِ سائنسی کاررَہبَندءِ شاہیمءَ تور کنیں باریں چینچو پشت کپیت۔ ہر گوستگیں وہد، گوستءِ بہرے، مئے کِسّہءِ بہرے۔ اے گوست پنچ روچ ساری اوں بوت کنت، سَد سال یا ہزاراں سال ساری ہم بوت کَنت۔ عام صورتءَ گپ یا واقعہ یا کسہ ہمینچو کہ کْوَہن تِر بیت، آئیءِ سورسءُ بُنزِہ نِزورتِر بیت۔ آئیءِ پَرریچءُ وضاحت ءِ گُنجائش ھمینجو گیشتر بنت۔ نوں اے گپ اوں پاد کئیت کہ تاریخ چیا لہتیں واقعہءَ گچین کَنتءُ لہتیں ڈالچار بیت۔ اے دَر چِنَگءِ تعلق گوں اے چیزءَ اِنت کہ انسانءِ انوگیں زند یا وہد گوں اے ایونٹءُ کِسّہاں چون ہمگرنچ اِنت یا چے حَدّءَ اثرمند اِنت۔ ہمے تاریخی کِسّہءُ واقعانی دَرچِنَگ، یک ہسابےءَ فردیءُ قومی بیانیہ ءِ پابند اِنت۔ پمیشکا باز وہدا تاریخ، سیاسی صورتءَ پروپیگنڈہءِ ہسابءَ ہم کارمرز کنگ بیت۔
تاریخءِ اہمیں واقعہ ءُ ہَبرانی چیردئیگ اوں تاریخءِ استحصال اِنت۔ دروگیں تاریخ یک دروگیں بیانیہ یے ودی کَنت۔ اشیءِ تاوان اے بیت کہ گوں راستیءَ راج یا فردءِ سیادی سدیت۔
نوں بیا تاریخءِ کاررَہبند یا میتڈولوجیءَ سرپد بُوگءِ جہد کنیں۔
تاریخءِ ہرچ ہبرے، واقعہ یے کہ مردم وانیت یا نبشتہ کنت تہ اے ہیال الّم دارگ کیپت کہ گپ یا ایوِنٹءِ بُنزِہءُ سرشون یا سورسءُ ریفرنس کُج اَنت۔ ہمے سورس، ریفرِنسءُ ثبوتانءَ گوں بے ریاہیں ںگاہےءَ چارگ، تاریخءِ کاررَہبند اِنت۔ تاریخءِ راستیں کِسّہءُ وتگَڑیں دروگیں کسہءَ بس ہمے یکیں شاہیمءِ سرا گیشینَگ بیت۔ ہما واقعہ ءِ بُنزِہءُ سورسءَ را گوں ہورتیءَ تنقیدی نظرءَ چارگ۔ تاریخءِ ثبوت، اے ہبرانی بُنزِہ یا سورس اَنت۔ اے سورس یا بُنزِہ، نبشتہ بوت کننت، اوزار بوت کننت، یا فوٹو، آڈیو، کتاب، ڈائری یا دگہ ثبوت بوت کَننت۔
سورسءِ دو تَہر اَنت۔ اولیءَ فرسٹ ہینڈ سورس گشنتءُ دومیءَ سیکنڈ ہینڈ سورس گشنت۔ فرسٹ ہینڈ سورس ہما اِنت کہ آ واقعہءِ وہدا ساڑی بوتگءُ سیکنڈ ہینڈ سورس ہما اِنت کہ آ فرسٹ ہینڈءِ نیمگا اشارہ کنت۔ مثالءِ ہبرءَ اگاں سپاہی یےءَ جنگءِ وہدا کاگدے نبشتہ کتہ، تہ اے نَمدی ہمے جنگءِ فرسٹ ہینڈ سورسےءُ اگاں کَسےءَ ہمے کاگد ونتہءُ اے کاگدءِ جند نوں گار اِںت، تہ اے کاگد وانوکءِ ہبرءُ نبشتہ اے رِدءَ سیکنڈ ہینڈ سورسے۔ پہ تاریخ نبشتہ کنوک یا شریں وانوکےءَ فرسٹ ہینڈ سورس اہم تر اَنت۔
بلے سورسءِ جندءَ را اوں، تاریخءِ کاررَہبندءِ ہسابءَ، تنقیدی نگاہےءَ چارگ الّمی اِنت۔ تاریخءِ کاررَہبندءِ تہا چار اہمیں لبز اَنت
چے؟
کئے؟
کُجا؟
چیا؟
ہمے لبز مدام زہنءَ دارَگی اَنت دانکہ ما بزانیں کہ گپ یا کسہءِ بُنزِہءُ سورس چینچو باوَرکَرز اِنت۔
چے؛ بِزاں سورسءِ جند چی یے؟ کجام تَہر انت؟ نمدی یے، اخباری بیانے، وڈیوے، قانونی دستاویزے، شعرے، فوٹوے، پینٹنگے یا دگہ چیزے بلے آئیءِ تہرءُ فارمءِ سرا تنقیدی نگاہے الّمی اِنت۔ پدا اے گپ ہم زہنءَ کنگی اِنت کہ اے تہرءُ فارمءِ تہا راست گوئیءِ چینچو گنجائش ہست۔ مثال ء ہبر ءَ، شعر ءِ تہا راست گوئی ءِ گنجائش کمتر انت ءُ وڑیو ءِ تہا گیشتر۔
کئے؛ ہمے مرد کہ گپءَ کنگا اِنت، وت کئے اِنت؟ سماجی بستار ئےِ چی انت، عُمرئِے چُنت اِنت، سیاسی یا مذہبی یقینءُ باورئِے چے اَنت۔ چہ اشیءَ مارا اے گپءِ نشان رَسنت کہ ما بزانیں سورسءِ جند ریاءُ رو کنت یا نا، ءُ ہما ہبرانی معناءَ شرتر سرپد بئیں۔ مثلاً اگن سپاہیءَ جنگءِ وہدا نمدی نبشتہ کتہ، اے سپاہی مذہبی مردمے، سرمایہ داریءِ پلّہ مرزے یا کمیونسٹے، عُمرئِے چُنت اِنت، جنینے یا مردین۔ اے درہیں چیز جنگءِ سرا آئیءِ ہبر کنگءُ جَنگءَ را چارگءِ سرا اثرانداز بوت کَننت۔ پمیشکا اے گپءِ زانگ اہم اِنت کہ سورس کئے اِنت۔
کجا؛ سورس کہ واقعہءِ سرا گپ کنگا اِنت، گپ کنگءِ وہدا وَت کُجا اِنت۔ ہما واقعہءِ سرا کہ گپءَ انت، وت چہ ہما واقعہءِ جاگہءَ چینچو نزیک یا دور اِنت۔ ہر کجا اِنت، چیا اودا اِنت، دَرانڈیہہ اِنت، جیل اِنت، تَرءُ تابءَ اِنت، لوگ ئِے ہمودا اِنت۔ سورسءِ جندءِ جاگہ ہم سک باز اثر کنت۔ پدا ہما سپاہیءِ مثالءَ بچاریں۔ سپاہی کاگدءَ چہ دژمنءِ قیدءَ نبشتہ کنگا اِنت، یا سنگرءَ نشتہ، یا وتی لوگءُ کوارٹرءَ نشتہءُ نبشتہ کنگا اِنت، اے جاگہانی اثر الّمءَ اے کاگدءِ سرا بیت۔
چیا؛ اے سورس چیا سورسے۔ اگن کسےءِ نبشتہ اِنت تہ آئیءَ نبشتہ پہ کجام مکسدءَ کتہ۔ اگاں بلڈنگءُ ماڑی یے تہ اے ماڑی اے جاگہءَ، اے رنگءَ چیا بَندَگ بوتہ۔ اگاں قانونے تہ اے قانون چیا جوڑ کنگ بوتہ۔ اگاں نمدی یا اخبارے بیانے تہ چیا نبیشتہ کنگ بوتہ۔ کئی واستا نبیسگ بوتہ۔ مثلاً سپاہی نمدیءَ وتی یازدہ سالی گوندوءِ سرا ہم نبشتہ کُت کَنت، دگہ سنگتیں سپاہی یےءِ سرا ہم،ءُ وتی مات یا فوجءِ مسترءِ سرا ہم۔ بلے ہرکَسی سرا کہ نبشتہ بکنت، نمدیءِ تہا فرق بیت۔ ماتءِ سرا آ گپءَ نبشتہ نہ کنت کہ فوجءِ مسترءِ سرا نبشتہ کنت۔
ہمے کَسانیں فرقانی ہیالءِ دارگ، تاریخءِ شَرّیں نبشتہ کنوکءُ وانوک، دوئینانی کار اِنت۔
