انسانی زندءَ سک باز دیمروی کُتگ۔ بیستءُ یکمی کرنءِ دومی دہک اِنت۔ انسانی زند ہچبر چو گوں وتی اوزاراں ہمگرنچ نبوتگ کہ مرچی اِنت۔ ما یک مزنیں تبدیلی یےءِ عہدءَ زِندگیں۔ ٹیکنالوجی سرجمیں انسانی زندگیءَ مٹینگا اِنت۔ اے تبدیلیءِ بُن ہشت وانگءُ زانگ اِنت۔ انفارمیشن اِنت۔ پیسرا انسانءِ دماغءَ وتی اوزار کار بستگ اَنت۔ فکر کنگ بس انسانی کارے بوتگ۔ بلے نوں اناں۔ مرچاں مشین ہم فکر کننت۔ مشینانی فکر کنگءُ آزاتیءَ کار کنگءَ آرٹیفیشل اِنٹلیجنس گُشنت۔
من یک بینکےءِ اینٹی منی لانڈرنگءُ ایںٹی ٹیرورسٹ فائنینسنگ ڈیپارٹمنٹءَ کارءَ آں۔ اے بینک وتی گراکانی زرانی مان بوگ ءُ درآہگ بزاں ٹرانزیکشناں چارگءِ واستا انچیں سسٹم جتگ کہ آوت فیصلہ کننت کہ کُجام ٹرانزیکشن گوں منی لانڈرنگ یا دہشتگردیءَ سیادی داشت کنت۔ ہرچ ٹرانزیکشنءِ سرا کہ مشین شکی بیت آ ہما کسٹُمرءِ سرا یک کیسے جوڑ کنتءُ آئیءِ دُرستیں انفارمیشناں مچ کنت۔ ہمے کیسءَ پدا منءُ منی ہمکاریں مردُم چاریںءُ یک رپورٹے جوڑ کنیں کہ آیا اے گراک منی لانڈرنگ یا دہشتگردیءِ مالی کُمک کنگا اِنت یا نا۔ انوں مئے بینک انچیں سِسٹُمےءِ سرا کارءَ اِنت کہ آ وت فیصلہ کُت کنت کہ آیا اے کیس گوں منی لانڈرنگءُ دہشتگردیءَ سیادی داریت یا نا۔ انوں اے سِسٹُم ٹیسٹ کنگ بوّگا اِنت۔ اگاں اے ٹیسٹءِ آسر شر بوت گڑا ہمے سسٹُم کار گرگ بیت۔ منی بازیں ہمکار ہمے جیڑگا اِنت کہ اے سسٹُمءَ رند آہانی کار شُت کنتءُ آہانی جاگہءَ کمپیوٹر وت کار کننت کہ اَہاں انسانی زلورت نبیت۔
اے جیڑہ بس منیءُ منی ہمکارانی نہ اِنت۔ اے یک جہانی جیڑہے۔ اے جیڑہ بس کارءُ روزگارءِ سرا ہم نہ اِنت۔ اے جیڑہ سرجمیں انسانی زندگیءِ بانداتءِ کسہ اِنت کہ اشیءِ تہا مہر، سیادی، جنگ، چاگرد، روزگار، علاج، وانگءُ زانگءُ کساس ہرچی آرٹیفیشل انٹیلیجنسءِ ردومءَ آماچ بیت۔
بی بی سی ورلڈءِ ڈئیٹنگ ائیپانی سرا رپورٹءِ ردا دُنیاءِ تہا ملینانی ہسابءَ مردُم وتی مہری دوستدار درگیجگءِ واستا ڈئیٹنگ ائیپ کارمرز کننت۔ یورپءِ گوریچانءِ گیشتر مردُم ٹئینڈڑ ائیپءَ کارمرز کننت۔ رودراتکیءُ زرباری یورپی مردُم بدو ائیپءَ ءُ جرمن زُبانءَ گپ کنوکیں مردُم لوبو ائیپءَ کارمرز کننت۔ تو اگاں جنکے ئے گڑا تو ائیپءَ ڈاونلوڈ کنئےءُ وتی زاتی انفارمیشنءَ ائیپءَ دیئےءُ تو اے ہم گُشئے کہ ترا چونیں بچک دوست بیت۔ ہمے ائیپ تئی تبءِ ہسابءَ ءُ تئی گوستگیں لائیکانی ہسابءَ بچکی پروفائل تئی دیما کاریتءُ تو لائیک کنئے۔ ہرچ لائیکءَ رند ہما بچکءَ نوٹیفیکشے رئوت۔ لہتیں وہدا رند، اے ائیپ تئی تبءَ انچو بلد بیت کہ ہما تئی دلءَ شوقتریں بچکاں تئی دیما کاریت۔ آ زانگءَ لگیت کہ ترا کُجام رنگءِ، کجام عمرءِ، کُجام جاگہہءِ، کُجام تبءِ بچک دوست بیت۔ تو ہمینچو کوَہنتر بئے، ہمینچو گیش کار مرز کنئے، آ ہمینچو گیش ترا سرپد بیت۔ سوال اش اِنت کہ ائیپ چون زانت؟ جواب چُش انت کہ ائیپءِ دماغءِ پروگرام الگوریدم اِنت۔ الگوریدم آرٹیفیشل انٹیلیجنسءِ زُبان اِنت۔ اے زُبان کوڈانی سرا اِنت۔ کمپیوٹر پروگرامر کوڈاں نبشتہ کننت۔ اے عملءِ ساڈاوکاں ابید، بازیں زانتکار آرٹیفیشل انٹیلیجنسءِ اے چاگردی کارءِ سرا ایراد گرنتءُ گُشنت کہ مشین انسانءِ لکھانی سالانی انسانی چاگردی تباں برباد کنگا اِنت کہ نوں انسانءِ بُنادی زلورت مردینءُ زالبولانی وپتءُ وابءِ درچنگءِ حقءَ ہم پچگرگا اِنت کہ اشیءِ اثر خاندانءُ دگہ چاگردی کارانی سرا کپگا انت کہ انسانی تب مشینی تب جوڑ بوگا انت۔
آٹومیشن آوکیں جنگانی سرا ہم مزنیں اثرے دور دنت۔ گوستگیں سالءَ امریکن ملٹری دہ بلین ڈالرءِ پروجیکٹ ”جوائنٹ انٹرپرائیز ڈیفنس انفراسٹرکچر“ کہ جیڈیءِ نامءَ زانگ بیت، ءِ سرا کار بندات کُتگ۔ اے پروجیکٹ امریکی فوجءِ سلاہاں کلاوڈ ٹیکنالوجیءِ تہا کنت کہ آودا سلاہ ہمینچو ردوم آماچ بنت کہ وت وتی ٹارگٹءَ در گیجنتءُ وتکار بنت کہ آہاں ہچ انسانی کُمک پکار نبیت۔ سلاہ گیشتر تُرسناک بنت ءُ گیشتر طاقتور بنت۔ انسانی حقانی سرا کار کنوکانی گُشگ اِنت کہ اے وڑیں عمل یک مزنیں کچےءَ تباہی کاریت۔ گوگلءُ مائیکروسوٖفٹ ٹیکنالوجیءِ سکیں مزنیں کمپنی اَنت۔ گوستگیں روچاں مائیکروسوفٹءِ کارہنداں مائیکروسوفٹءَ را گُشتگ ات کہ جیڈیءِ ٹیکہءَ مزورءُ بہر مبو۔ بلے مائیکروسوٖفٹءِ سی ای او ستیاناڈیال، ہندوستانی مردُمےِ، اشانی گپ ہمے بُنیادءَ کِمار نکُتگ اَت کہ امریکہءِ فوجءَ امریکہءِ مُلکی دستورءَ جوڑ کُتگءُ امریکہءِ سیکورٹیءِ زمہ وار اِنت۔ ہرچی کہ امریکہءَ گیشتر طاقتور کنتءُ امریکہءِ قانونانی ہلاپ نہ اِنت۔ مائیکروسوفٹءَ ہمے گلانی گوما ہچ وڑیں مُشکلے پہ کار کنگءَ نیست۔
آرٹیفیشل انٹیلیجنسءِ سرا ایراد روچ پہ روچ ودان اِنت۔ اے ایراد گیشتر اخلاقیءُ مالی، چاگردیءُ روزگارءِ بابتءَ انت۔ ایراد گروکانی گُشگ اِنت کہ چہ مشینانی وجہءَ سکیں سیریں مردُم ہمینچو طاقتور بنت کہ آہاں واریں مردُمانی ہچ وڑیں حاجت نبیت۔ واری گیش بوان بیت۔ سیریں مردُم واریں مردُماں یا وَ کُشنت یا واریءُ گُژن واریں مردُماں وت ہلاس کنت۔ آرٹییفیشل انٹیلیجنسءِ دوستداروکانی گُشگ اِنت کہ اے اولی رند نہ اِنت کہ لہتیں مردُم ٹیکنالوجیءِ بابتءَ مردُماں تُرسینگءَ اَنت کہ نوکیں ٹیکنالوجی انسانءِ بانداتءَ ہلاس کنت بلکنہ اے انسانءِ تاریخءِ ہر وہدا بہر بوتگ اَنتءُ اشانی کار اِنت کہ مردُماں بُترسیننت۔ دگہ یک ٹولی یے است اِنت کہ آ میانءَ نشتگءُ گُشیت کہ ٹیکنالوجی شر اِنت بلے دُنیاءِ زورآوریں ملک انچیں قانون جوڑ بکننت کہ ٹیکنالوجیءَ اخلاقی حدانی تہا بکننتءُ زمینءِ سرا انسانی بانداتءِ رکھینگءِ جُہدءَ بکننت اگاں نا تباہی یے لازُم کئیت۔
ٹیکنالوجی انسانی زندءَ گہتر کنت یا گنتر، آبادی کاریت یا بربادی اے گپ انگہ نگیشتگیں گپے۔ بلے یک گپے پکا اِنت کہ آرٹیفیشل انٹیلیجنس نوں زمینءِ سرا انسانی زندگیءِ بہرے۔ ہما راج کہ اشیءَ بلد نبنت، سک پشت کپنت۔
