Sabá Etizáz, BBC Urdu, 28 Aktúbar, 2016
Gwádare Samína Bakśe cukk watí kastiréń brát yá guháre wadí bayage wadárá be mát bít ant.
Yak rócéá pésar, sarzáhirá kandók u díwándirrén Samína, cukke wadí bayage damánáń bérán bút. Samínae mastiréń jinik, 10 sálí Asmaá watí máte margá grét ham nakut ki núń áíára watí kastiréń brát u guháráń mát jóŕ bayagí at.
Jánsalámatíe zánógir gwaśant ki agáń Samínaára pa wahd jánsalámatie ásrátí u kumakk birastéń ta zindag bíttag at u watí cukk é mazan bayag u rudagá dístag atant, bali awalí randá ki đákŧaré nasíbe bút ta pa áíe marge sarŧífikiŧe dayagá.
Samínae duskícc Obíza Bakśá gwaśt ki Samína dráh u salámatéń mardumé at, kapage wahdá áíá apréśin darkár at, bali đákŧar nest at.
Obízae gwaśag int ki ‘Á śapá jóŕ u salámat at u góń má gapp u majlisá at, nájóŕ bút, má hispitálá burt. Áúdá kasánéń đákŧará gwaśt ki mát u cukk salámat ań, bali má béwaséń, apréśin kanók nést. ‘Maní niśár maní cammání démá bérán bút’.
Balócístáne tayábdapí śahr Gwádará bandargáh, nókéń dagg u zimínne kár u bárá kuruŕáń kaldár málíate bápár bayagá int, bali hukúmat bándáte ”Mega City” e jahminindání ham hayálá int yá ná?
Indiga bunyádí jéŕahání pemá jánsalámatíe némagá ham Hukúmate dilgóśé nést.
Gwádar Đisŧrik Hispitál, śahre yakkéń pacéń hispitál int u đákŧar Samína, yakkéń zálbúléń đákŧar.
Hamróc, kisás pa sadáń nádráhe cáragá, góń watí dambarag o źandíá jang kant, bali góń é rástíá hic pemá jang kut nakant ki druhéń śahrá janéní nádráhíání yak ham zántkáréń đákŧaré nést. Láp porréń zálbul pa kapag u iláje hátirá mílláń dír Karácíá ráh dayag kapant u é díréń ráh marg u zinde mánzamán int.
Đákŧar Samínae watí 18 sálí trízatká, cillagíe wahdá, Gynecologist u iláje ásrátí nabayage sawabá áíe démá sáh dát.
Áíá gwaśt ki ‘me gwará apréśin teŧar hast bali Anesthesiologist nést, Maternity wárđ hast bali Gynecologist nést. Báid iń é waŕ mabítén, é kuje insáp iń’.
Gwádare hispitálá hamuk róc zálbulání lená ki ginde, zánag bít ki jánsalámatíe jéŕa cón iń. Nars u đákŧar sak kamm ant. Zántkáraní ridá hukúmatá pa handí đákŧráń śihméń koŧaé nagíśśénta.
Ca đanná atkagéń đákŧar é waŕéń jáwarání tahá táń dérá kár kut nakanant ki jánsalámatíe ásrátíání bunyádí nizámé ham nést iń.
Taníga đákŧarání posŧ hálíg ant u nádráhání len drájtir bayán iń.
Márá gwaśteś ki lahtéń máhá pésar zálbúlání wárđe catt nádráhée sará kapta.
Ásrátí ancó kamm ant ki intizámíaá hamé kasánéń kunđ hálí kuta bali indiga wárđ sarjamíá anga hamá pemá kármarz bayagá int.
Hispitáláń ra u á kanókéń, béwaséń mahlúnke hálat wat é rástíá paddar kanagá int ki yak némagé wa Mega City é jóŕ bayagá int, bali domí némagá, é śahre jahminind taníga pa jánsalámatíe bunyádí ásrátíáń talwasagá ant.
