News Desk

انسانی حقّانی میان اُستمانی روچ ءَ بلوچانی ہواریں احتجاج

Baloch National Movement, baloch nationalism, world human rights

 

چہ گوْستگیں بازیں سالاں یکے دومی ءَ دوری ءَ پَد، بازیں بلوچ تنظیماں انسانی حقّانی میان استمانی روچ ءَ دنیا ءِ بازیں مُلکاں بلوچستان ءَ انسانی حقانی لگتمالی ءِ خلاف ءَ پہ ہم پتّی احتجاج کُت ءُ ریلی کَش اِت۔

بلوچ نیشنل موومنٹ، بلوچ ریپبلکن پارٹی، بلوچ ریپبلکن اسٹوڈنٹس آرگنائزیشن ءُ بلوچ اسٹوڈنٹس آرگنائزیشن ءَ بلوچستان ءِ تہا پاکستان فوج ءِ ”جنگی گُناہانی“ خلاف ءَ احتجاجاں بہر زُرت۔

آسٹریلیا، کینیڈا، جرمنی، ساؤتھ کوریا ءُ برطانیہ ءِ تہا ریلی برجم دارگ بوتنت۔

https://www.youtube.com/watch?v=HbeZVwazREQ

بلوچستان ءِ جند ءِ تہا قوم پرست سیاست ءِ اجازت نیست ءُ خاص آزاتی لوٹوکیں پارٹیانی باسک اے وڑیں ریلیاں بہر زورگ ءِ وجہ ءَ جَنَگ ہم بنت۔

چہ بی۔ آر۔پی ءِ نیمگا شیر محمد بُگٹی ءُ منصور بلوچ، چہ بی۔این۔ایم ءِ نیمگا حمل حیدر ءُ نسیم بلوچ ءُ چہ بی۔ایس۔او ءِ نیمگا لطیف جوہر ءُ نیاز بلوچ ءَ دنیا ءِ دگہ دگہ شہراں اے ریلیانی رہشونی کُت۔

گیشتریں بہر زورک سیاسی پناہگیر یا ہما اتنت کہ آ اے مُلکاں سیاسی پناہ ءِ لوٹوک انت۔

چہ گوْستگیں دہ سالاں بلوچ جنز ءِ ایرموش کنگ ءِ واستا ایف سی ءُ انٹیلی ایجنسیاں بلوچانی کُشگ ءُ دؤر دیگے بنا کُتگ کہ چریشی ءِ آسر ءَ سداں بلوچ سیاسی جہدکار پہ وتی ساہ ءِ رکّینگ ءَ گلف ءُ یورپی مُلکاں اَتکگ انت۔

ریلیانی بہرزوروکاں پلے کارڑ دست ءَ اتنت ءُ چہ اقوام متحدہ ءُ ڈنّی دنیا ءَ دزبندی کنگ ءَ اتنت کہ بلوچانی خلاف ءَ پاکستان ءِ جنگی گُناہانی دیم دارگ بہ بیت ءُ اقوام متحدہ ءِ تہا پاکستان ءَ جاگہ دیگ مہ بیت چیا کہ ”پاکستان ءَ ناں انسانی حقانی میاں استمانی قانونانی پاسداری کتگ، ناں جینوا کنونشن ءُ ناں انسانی حقانی درگت ءَ اقوام متحدہ ءِ ایدگہ رہبندانی“۔

اے وڑیں ہم پتّیں احتجاج  ءُ ریلی چہ بلوچ تنظیمانی نیمگ ءَ باز وہد ءَ رند گندگ بوتگ چیا کہ دیر انت آ وت ماں وت ءَ دلگران بوتگ انت۔

بلے ہمے سال ءِ اکتوبر ءِ ماہ ءَ بی۔آر۔پی ءِ کماش براہمداگ بُگٹی ءُ بی۔این۔ایم ءِ مستر خلیل بلوچ ءَ ٹیلیفون ءِ سر ءَ ہال اہوال ءَ رند ہواریں بیانے داتگ ات کہ دوئیں گل زوت نزّیکی ءِ نیمگا رونت۔

بلوچستان ٹائمز ءِ حالگرے ءِ ہساب ءَ دوئیں سروکانی اے دو پہ دوئی ترْان سالے ءُ نیم ءَ پد بوتگ۔

اے ماہ ءِ اولی ہپتگ ءَ، دوئیں پارٹیانی لہتیں سینئیریں سروکاں جینیوا ءَ مُلاقات ءَ پَد اے مِستاگی داتگ ات کہ آ دیمتر ءَ ہمکاری ءِ نیمگ ءَ رونت۔

 

Don’t miss posts from Balochistan Times!

We don’t spam!

+ posts

Leave a Comment