Home / Balochi / داعش چے یے؟

داعش چے یے؟

اپریل 2014 ءَ داعش عراق ءِ دوہمی مستریں شہر موصل ءِ سرءَ قبضہ کنت ۔ دنیا ءِ فوجی زانتکار اے گپ ءَ ہیران بنت کہ چون یک بے نام ءُ نشانیں تنظیمے  امریکہ ءِ ٹرین کتگیں عراقی فوج ءَ بے لٹ ءَ جنت ءُ تاچینیت ءُ دُرہیں سرکاری ادارہانی سرءَ قبضہ کنت۔

بیست ءُ یکّمی روچ ءَ موصل داعش ءِ جنگی، کاروباری ءُ سرکاری ہیڈکوارٹرزجوڑ بیت۔ ہمنچو زر کہ چہ بینکاں لُٹّگ بنت یا عام سرکارءِ نہ بوھگ ءِ سبب ءَ معمولاتی زندگی ءِ ہمنچو ٹیکس کہ جم بیت آھان چہ ابید خلیج ءِ ملکانی تہا ملا ءُ عرب شیخانی جمعہ ءِ نمازءَ رند چندا ءَ چہ گرگ بوتگیں زَر داعش ءِ جنگی زلورت ءُ پروپیگنڈہ ءِ واستا ہرچ بنت۔

اگاں داعشءِ بنداتی  جنگی حکمت عملی ءَ بچارے گڈا ہمے شہر کہ تیل ءَ سیرتِرءُ نزیک تِر بنت داعش آہاں وتی اولی ٹارگٹ کنت۔ ۔حملہ ءَ چہ رند داعش تیل ءِ تجارت ءَ دست ءَ گیپت۔ جون 2014 ءَ تاں داعش تیلءِ کاروبارءِ سرءَ روچے دو ملین ڈالر کٹّیت۔ ایشیءَ چہ اے زانگ بیت کہ اے تنظیم ءَ وتی آہگا پیسر وتی واستا مالی وتواجہی ءِ جوانیں حکمت عملی یے گوں بوتگ۔

سنگتے ءَ نام گپت کہ یک خلیجی ملکےءَ جمعہ ءِ نمازءَ رند آ اوشتوک بیت، ہمودا ملا چندہ کن انت ءُ عصرءِ نمازءَ پیسر کساس 300,000 ڈالر جم کننت۔ سنگت گشیت چندہ کنوکاں اسپیکر ءِ سرءَ ہمے جار جتہ کہ ’’مرچیگیں چندہ بس توپنگ ءُ جنگی ساز ءُ ساماناں زورگ ءِ واستا اِنت۔ اے دُراہیں زَر سُوریا ءِ جہادیاں روَاَنت۔

خیر زَر مُچ بیت۔ بے کساس زَر، ہمنچو زَر کہ من تو باور کُت نہ کنیں، ڈالر۔

سُوریا ءَ چار سالی جنگ ءَ اے وھد ءَ تاں جہادی گنوکانی اے زمینءِ سرءَ آرگ ءُ سر کنگ مزنیں ہبرے نہ اَت ۔ جہادی سُوریا ءِ جنگ ءِ تہا ’’ کافرانی ‘‘ کُشگ ءَ بس نہ کننت۔ داعش دنیا ءِ دُرائیں جہادیانی واستا یک تنظیمی آشوبے ءِ رنگ ءَ دیما کئیت۔ اگان تو شریں جنگولے ئے ، بمبار ءُ ٹِک تیرے ئے، داعشءَ پہ تو کار اِنت۔ اگاں تو ویڈیو گرافی، کمپیوٹر ءُ نوکیں ٹیکنالوجی زان ئے داعشءَ پرتو کار اِنت۔ مقصد ایش انت کہ داعشءَ پہ دُرستانی واستا یک قابل ء عمل پلیٹ فارمے دیما آورت ۔ تو توری برطانیہءِ جہادی یے بہ بئے یا افغان طالبانے داعش تئی جاگہ ات۔

اکتوبر 2015 ءَ یک مالداریں سعودی شیخے لبنان ایئرپورٹءَ نشہی گولیانی برگا گرگ بیت۔وتی پرائیویٹ جہازءِ سوار بوھگءَ پیسر، شیخ ءَ مُہربستگیں 40 سُویٹ کیس ءُ یک سعودی ڈپلومیٹک پاسپورٹے گون ات۔ سوٹ کیسانی تہا 2000 کلو نشہی گولی در کئیت کہ عراق ءُ سعودی فوجیانی تہا مشہور بیت۔ سوریا ءِ جہادیانی تہا ہم اے گولی سک عام بیت۔ اے گولی ءِ ورگا رند جہادی وتی کوشارینگ ءُ دگر ءِ کُشگ ءَ چک ءُ پد نہ بنت۔ بلے اے گولی سک پَلج کنت۔ اگں مہ رسیت ایشی ءِ عادی ئیں مردم کٹ ءُ کار ءَ روت۔ پمشکا داعش ءِ مدام کوشش بوتگ کہ اے گولی ءِ آہگ بند مہ بیت۔

بَرگر جہادی

نوں کار درست گیگ بنت، بس جنگ ءَ ہمّت لوٹ ایت۔ اے رندءَ اسلامی جنگ گوں نوکیں دنیا ءِ رہبندانی ہساب ءَ بیت۔ سوشل میڈیا ءِ تہا داعشءِ بھرتی شروع بنت۔ سدانی حساب ءَ چہ یورپ ءُ نارتھ امریکہ ءِ انگریز تعلیم یافتہ جہادی نوجوان کاینت ہدا ءِ شوہازگءَ۔ ہنچو کہ اے برگر جہادی سوریا ءُ عراق ءَ رسنت ایشانی تہا بازینے ہما دمانءَ پشومان بیت ءُ واپسی ءِ راہاں شوہاز کنت پرچہ کہ جہاد چو کہ ٹویٹر ءَ ظاہر بوتگ آ وڈ نہ ات۔ برگر جہادیانی پاسپورٹ پچ گرگ بنت ءُ ایشانی واپسیءِ درائیں راہ بند کنگ بنت۔ پدا ہمے جہادیانی وسیلہ ءَ داعش ءِ نوکین وانندہ امیج دنیا ءَ پیشدارگ بیت۔ اگاں تو جزباتی بوتگ ئے لوگ ءَ جستگ ءُ ٹکٹ کتگ ھزار رُسوائی ءَ رند وتارا سوریا ءَ رسینتگ نوں مِرے زندگ بئے تئی جاہ ہمیش اِنت۔ تو ستر بکن ئے کہ نون نہ تئی انگریز ملک ترا پدا زوریت ءُ نہ کہ داعش ترا پہ  آرامءِ دل کِلّیت۔

داعش ءِ بیمءِ مزنیں وسیلہے آئی ءِ پروپیگنڈہ ویڈیو بنت۔ ایشانی تہا مردمانی ہلار کنگ، پدا ہمے ہلار کنگءِ اسلامی تشریح دئیگ، برگر جہادیانی گوں کارچ ءُ کاٹاراں پیش دارگ دنیا ءَ لرزینیت۔ اے ویڈیوآنی تہا داعش ءِ دیم ءُ زبان یورپ ءِ برگر جہادی بنت۔

داعش ءِ پلّہ مرزیں مُلک

کارلوتا گال نیویارک ٹائمز ءَ نبشتہ کنت کہ سداں ہزارانی حسابءَ جہادی یک برے کوئٹہ ءَ سربنت ، پدا پاکستانی سرکارءِ کمک ءَ قطرءَ رسنت ءُ نقلی پاسپورٹانی سرءَ ترکی ءَ بال کن اَنت ءُ سُوریا ءَ پُترانت۔ ایشانی تہا کم از کم 300 پاکستانءِ جہادی بنت۔

داعشءِ کامیابیءَ لہتیں ملکانی مزنیں مفادے ہوار بیت۔ مثال ءِ ہبر ءَ ترکی داعش ءِ سر ظاہرءَ پلینڈیں ھمساھگ ءُ چیروکائیءَ دوستریں یار بیت۔ آئیءِ مزنیں وجہ اے بیت کہ ترکی کردانی دیمءَ آرگ ءُ سلاہبند کنگ ءِ حقءَ نہ بیت۔ پرے ھاترءَ آ ھرچ ساھت ءُ دمان گون امریکہ ءُ اتحادی ملکاں نُرنڈ ءُ کُپ کنت کہ شما پرچہ کُرداں کمک کنئے۔ دومہ وجہ ایش بیت کہ داعش ءِ تیل ءِ تجارت ءَ ترکی درستاں چہ گیش فائدگ چست کنت۔ یکے وا ترکیءِ جندءَ ارزان ءَ تیل رسیت، دوہمی داعش کردانی جَنگ ءَ دلے دنت۔ پمیشکا وہدے ترکی ءِ کردانی آزاتی پسند تنظیم پی۔کے۔کے گیس پائپ لائناں ترْاکین انت گڈا عراقی پیشمرگہ والہ کُرد پرے گپ ءَ وش نہ بنت۔

 ازگار ءُ اسپیت پوستانی داعش

داعش دنیا ءِ ازگارتریں ءُ بیمناک تریں دہشت گرد تنظیم منّگ بیت۔ اشی ءِ روچے ءِ آمدن 3 ملین ڈالر انت ءُ سالے ءِ 2 بلین ڈالر۔ داعش وتا درستیں مسلمانانی اسلامی ریاست (آئی ایس ) گُشیت بلے داعش ءِ عرب ءُ اسپیت پوستیں جنگولانی ارزشت دگرے ءُ افریقی سیاہ پوستانی دگہ۔ مال ء غنیمیت ءِ تہا شررنگیں جنک عرب جنگولان رسنت ءُ بنگالی ءُ افریقی جنگولانی کار عربانی ازمت گزاری کنگ انت۔

About Murid Baloch

Check Also

Tales from the dungeon: Dr Yousuf Murad Baloch (Part I)

This is first part of Balochistan Time’s Tales from the dungeon series in which former victims …

Leave a Reply

Your email address will not be published. Required fields are marked *