Home / Balochi / سارتو

سارتو

من پیرسالیں گَنجُلاں

گاریں جنگیانءِ زال

مات واریں سارتوءِ

نزاناں چون اِنت ایشیءَ

ہزار ویل ءَ گْور جتہ

ہزار ہوپءُ اِلّتءَ

ہزار نادْراہیءَ،

بگندئے سِہرءُ سامڑی کتہ

بگندئے چمّےءَ جتہ

بگندئے ہِرسےءَ شِتہ

اگاں ناں، چو نہ بیت

اے شاہُکاریں ماتءِ زَہگ

آ کُہہ پُلنگ ءِ لاڑیں بَچ

چو کپتہ کارءُ ننگ بیت!؟؟

نہ بیت کَسّءَ چو گُمان

کَسے نہ بارت توٌد چو

من الّماں کہ ہست جیڑہے کہ جیڑگاں

نزاناں بے نوائیں جنگیانءِ ہال چے؟

بلے اے شُومیں سارتوءَ

منارا تین پہ دل کتہ

اے کپتہ کار

اے ہاک پہ سر

نہ بوت پہ ما پُشپدے

مں پیرءُ آجِزاں

کُجا چہِ بیاراں زَرّءُ مال؟

کجا چہِ وشیں وَردِنءُ وراک

پہ سارتوءَ

مں وَس کتہ کہ کارءُ ہزمتے بکن

بلے کُج اِنت!!؟

                                            **

مئے میتگءِ کماش، میر گاجیان شَپُکّے اَت

میر گاجیان ءُ جنگیانءَ ساہ بہر کُت

دوست اتنت دِلی

اِدا چہ مال ءُ دلوَت اِش رسینت

چہ گوادرءَ، کُلاچیءَ

چہ جاشکءُ چاه بار،

شاه بندناں، ولائتاں

عراقءَ، زنگبارءَ، مشکتءَ

کجا کجا..؟؟

چہ اُوداں مال ئےِ بَست

گَڑیں گُدءَ گُدام پُرّ اتنت

شاہگان ءُ سرفِرازی اَت مں کُوچگ ءَ

جنگیان چِرِیکّے اَت

مئے زندگی چو واب وَشّ اتنت

                                       **

چُنیں نگیگیں اَتک جاورے

چُنیں نہ وشّیں وهدے اَتک

نہ اِنت کَسّ کَسّیگی

ہَرکہَ گیش ء وَت

نَپسانَپسی اِنت

مئے شادہانی روچ گَرداتنت

رَنگ ءُ داب گَشت اَنت نوبتءِ

پہ ما چَہر وارت زمانگءَ

                                         **

اَناگتا اے ہال شِنگ بوت

کہ بند کتہ شَپُکّی میر گاجیان

ہکومتءَ ”مکن“ کتہ

اے ہال گردشءَ اتنت

 کہ جنگیان شُت

پہ کارءُ روزگارءِ پَٹّگ ءَ

پدا نہ یَتک

ہُدا بزانت

تو ہست ئے یا کہ نیست؟

زندگ ئے یا مُرتگ ئے؟

آجوئے یا بندی ئے؟

مں سیاہیں جامَگے بہ پوشاں یا کہ ناں؟

مں پُرسی پَتّرے بریچاں یا کہ ناں؟

مں گارءُ سیاہ نشتگاں گوں اندواں

نزاناں چوں کناں؟

                                             **

نہ وَنت چارموٌٹیں سارتوءَ

نہ کسب ءُ کار ئِے ہیل کت

پِت ءَ اوں زور پِر نہ دات

کہ چَمّ دوءُ چُکّ یکّ

منی اوں گپ ئےِ اِش نہ کُت

کہ لاڑُک اَت

منا وَ اَنگہ دل نہ بیت پہ چمءِ چارگءَ

منی وَ دپ نہ گیپت

بلے…!

اے جان دُزّ،

اے سُتکہ بَڈّ

سالءِ وابءَ پاد بئیت

انگہ ژَندءُ ژُولّ

گُشئے کہ گِپتہ رَنجےءَ

گوں گْواتءَ چیکّ وارت مُدام

کار…؟؟

دستءَ آپءَ ہم نہ جنت

گُشنت میتگ ءِ بچک

سارت پُلّ اَپِینّ وارت، چَرس کنت

پَمِشکا چمّ ئےِ پَچ نہ بنت

کارءُ ہِزمتی نہ اِنت

                                             **

کَہ اِنت اے جنگلءَ اَپینّءُ چَرس بہر کنت؟؟

کَہ اِنت چوشیں کَہر کنت؟؟

                                            **

مں پیرسالیں گَنجُلاں

گاریں جنگیانءِ زال

مات واریں سارتوءِ

About Manzoor Bismil

Check Also

Tales from the dungeon: Dr Yousuf Murad Baloch (Part I)

This is first part of Balochistan Time’s Tales from the dungeon series in which former victims …

Leave a Reply

Your email address will not be published. Required fields are marked *