Sajid Hussain

ساہیجی ءِ شہید چینچُک انت؟

ہمے بلوچ سلاہ بنداں کہ ساہیجی ءِ تہا فوج ءِ انگّراں بوتگ انت، زانتگ کہ اے راہ کہ ما پہ وت دوست کُتگ اشی ءِ تہا مَرگ راہ ءِ سرا اوشتاتگ۔ قدیر بلوچ کہ فوج ءِ دست ءَ شہید بوتگ، آ شہادت ءِ واستا ساڑی بوتگ۔

بلوچ سلاہ بندیں جہدکاراں ساہیجی ءِ چیریں راہ ءُ در ہم زانتگ انت۔ کجا ورگی آپ درگیجگی انت، کجام آپ ءَ زہر مان بوت کنت، کجام چیریں لّٹ ءَ چہ درایگی انت۔

بلے ہما چاریں یا پنچیں بلوچ کہ بلوچ ریپلیکن آرمی ءَ چِست کتگ انت ءُ جنگ ءِ وہدا ساہیجی ءَ موجود بوتگ انت، آہانی سر ءُ گوشے ہم سہی نہ بوتگ کہ آہاں اے وڑیں گرْانیں مرگے نسیب بیت۔ چہ تُن ءُ شد ءِ مرگ درستاں گرانتر انت۔ ایشاں نہ ساہیجی ءِ گٹ پیش ءَ دیستگ انت ءُ ناں چُشیں بشارتے بوتگ اش کہ ہودا ما چہ تُن ءُ شُد ءَ لَگتکی جنیں مِریں۔

اگں قدیر بلوچ فوج ءَ شہید کُتگ گڈا ہمیں چاریں یا پنچیں بلوچانی شہادت ءِ ذمہ وار کئے انت؟ اشاں کجام دلّاری کتہ کہ بلوچیں تنظیمے ءَ کہ وتا بلوچانی پہریزوک گُشیت آوار جتگ ءُ بُرتنت؟ اے کجام بلوچی دود انت کہ وتا بہ کَش ءُ وتی باہوٹاں پہ تُن مِرگ ءَ یلہ دئے؟

ہمے سلاہ بنداں کہ ایش آوار جتگ انت آہانی وتی گشگ ہمیش انت کہ اشاں دگہ مسلہے نہ بوتگ ءُ مارا یلہ دیگی بوتگ انت، فوج ءِ آیگ ءِ وجہ ءَ چوش بوتگ۔ بلے آوار پرچہ جتگ انت؟

ہر دومی روچ ءِ سرا دو بلوچ، کماشے بیت شر ورناہے شر، ءِ چمّاں بند بہ بر وتی کرّا بدار کہ مارا شَک انت ءُ ما تفتیش کنگا ایں۔ آوار جتگیں مردم بلوچ دودانی ہساب ءَ ہما روچ ءَ مرتگ انت کہ آوانی چم بندگ ءُ چِست کنگ بوتگ انت۔

اگں اے جنگ پہ بلوچان انت گڈا بلوچاں فوج ءِ زوراکی ءُ کُشت ءُ ہون بس انت۔ آ کہ وتا سرمچار گُشنت آ تنا وہدے کہ بلوچ ءِ پہریزوک نہ بنت بلوچ آہاں پہ وتیگی نہ کننت۔

چوش نہ انت کہ بلوچے ہرچی کنت آئی ءَ کیچ ءُ توت پِر مہ بیت۔ بلے ناں کہ ہر بلوچے راہ ءَ تئی دپ ءَ کپیت چِست اش کن ءُ بَر۔ ہما کہ ڈیتھ اسکواڑانی مردم انت، ہما کہ دست ءَ دلبند ءَ جننت ءُ گوْشنت کہ ما تئی دلاّری ءَ کنگا ایں، ہما کہ فوج ءِ ہمراہ انت، سزا ءُ احستاب لوٹنت۔ بلے ناں کہ ڈاکٹرے سرکاری گاڑی یے گوننت ئےِ تو بدار ئےِ ءُ بے عزت ئےِ بہ کن ءُ گاڑی ءِ پچ گِر۔ مکران ءِ تہا اگں کار ءُ روزگارے ہست گیشر سرکاری انت۔ ہودا کس ءَ فیکٹری نہ جتگ کہ بلوچ ہودا وتی لاپ ءَ شوہاز بہ کننت۔ اے ہزاراں بلوچ کہ سرکاری کار ءَ انت، کُشگی انت؟ گڑا وَ کوم ءِ جند ہلاس بیت۔ بلوچستان ءَ اگں آزات بہ کنئے ہم، آئی ءَ بلوچ مان نہ بیت۔

ہمے بلوچ کہ گوْشنت شُد ءُ تُن ءَ ساہ اش داتگ، اشانی میار ءُ گناہ چے بوتگ۔ ٹھیکیداری؟

ہمیشانی تہا یکے کمبر چاکر ءِ کماش بوتگ۔ لہتیں گوْشیت لاش ئےِ دست کپتہ لہتیں گوْشیت ناں۔ کمبر چاکر ءَ بلوچستان ءِ آزاتی ءِ جہد ءَ وتا کوشارینت پمیشکا کہ مرچی آئی ءِ پِت ءَ بے گناہ ءُ میار ءَ چو بے عزت ءُ کم شرپ بکنئے ءُ گرانیں مرگے ءِ واستا یلہ بدیئے؟

اشانی مرگ ءِ ذمہ واری فوج ءِ سرا وَ کئیت، بلے گیشتریں ذمہ واری ہما مردمانی انت کہ وتا ہمیشانی پہریزوک ءُ پاسپان گوْشنت۔

اگں آجوئی ءِ جہد انچو دیما برگ بہ بیت، آ روچ ہم کئیت کہ بلوچ وت فوج ءِ دست ءَ گِرنت ءُ بلوچانی سنگراں بَر انت۔ بائد انت براہمدگ بگٹی ءُ اے دگہ سروک آ روچ ءِ آیگا پیسر اے وڑیں پد نہ بودیں کارانی سرا بہ گرنت۔

Don’t miss posts from Balochistan Times!

We don’t spam!

+ posts

Sajid Hussain (1981-2020) was a writer and senior journalist from Balochistan. He had a degree in Economics, International Relations and English Literature from Karachi University. He had the experience of working with Pakistani newspapers Daily Times and The News International. Sajid Hussain was also the founding editor of this online magazine.

Leave a Comment