Iltap Baloch

راجدپتر ءَ سردارانی راجی کِرد ۔۔۔ سیمی بہر

گوْشنت کہ میر نصیر خان اول بہادر ءُ زانتکاریں مردے بیت۔ آئی ءَ وتی ہاکمی ءِ بنداتی زمانگ ءَ وتی کش ءُ کِرّ ءِ تیوگیں ٹک ءُ کبیلہ گوں وتا ہوار کتنت۔ یک مہکمیں لشکرے پہ وَت جوڑ کت کہ اے لشکر میر نصیر خان ءِ گوْانکے ءَ وتی ہونانی ریچگا چَکّ ءُ پد نہ بوت۔ گیشتر پولکارءُ نبشتہ کارانی گشگ اِنت کہ بلوچ تاریخ ءِ تہا زانتکار تریں خان میر نصیر خان اوّل بوتگ۔

ہمے زمانگاں ماں پنجگورءَ میر مہر اللہ خان گچکی ءِ بیرانی ءَ پد آئی ءِ مستریں بچّ میر عیسیٰ خان پنجگور ءِ سردار جوڑ کنگ بیت، بلئے میر عیسیٰ خان ءِ کستریں برْات زوت میر عیسیٰ خان ءَ کُشیت ءُ ہاکمی ءَ وت زوریت۔ میر عیسیٰ خان ءِ بچّ میر کرم شاہ تچیت ءُ کلات ءَ وتا سر کنت ءُ میر نصیر خان ءِ گوْرا پناہ زوریت ءُ پنجگورءَ چہ وتی ناکو ءِ سرداری ءِ ہلاس کنگ ءِ واستا کُمک لوٹیت۔ نصیر خان ءَ چہ پیسرا ہمے واہگ داشتگ ات کہ آ پنجگو، کیچ ءُ مکران ءِ اندگہ دمگاں بہ گیپت، ہمے واستا میر نصیر خان ءَ اے موقع یلہ نہ دات ءُ گوں وتی لشکرءَ پنجگور ءِ سرا اُرش کنت۔ سردار میر گاجیان تچیت دیم پہ تمپ ءَ سر بیت ءُ پنجگورءَ میر کرم شاہ گچکی سردار جوڑ کنگ بیت۔

kird

چہ میر نصیر خان اول ءَ پیش، ءُ نصیر خان ءِ زمانگ ءَ اوں کلات ءِ ہاکم اوگانستان ءِ دستءِ چیرءَ بوتگنت، بلئے نصیر خان گوں اوگانستان ءِ ہاکم احمد شاہ ابدالیءَ بلاہیں جنگے کنت ءُ بلوچ ہاکمی ءَ چہ اوگانستان ءِ دست ءِ چیرا کشّیت۔ البتہ اے کارءِ واستہ نصیر خان گوں اوگانستان ءِ ہاکم احمد شاہ ابدالی ءَ چِلّ روچ ءِ جنگ ءَ پد کہَ سلاہ کنت، نصیر خان یک برات زتکے گوں احمد شاہ ابدالی ءِ بچّ تیمور شاہ ءَ سانگ دنت۔

نصیر خان ءِ مستریں ردیاں چہ یکے اے بوتگ کہ آئی ءَ مذہب ءِ نام ءِ سرا ہزاراں بلوچ کُشتگ۔ اے زمانگ ءَ مکران ءِ کساس تیوگیں آبادی ذگری بوتگ۔ وتی ہاکمی ءِ مہکم کنگ ءِ واستا نصیر خان ءَ تیوگیں بلوچستان ءَ ہون ریچی ءُ لُٹ و پُل اوں کتگ۔ البتہ نصیر خان اولی سردار بوتگ کہ آئی ءَ تیوگیں بلوچ سرڈگار یک بُنجاہی ہاکمی یے ءِ چیرا آرگ ءِ جہد کتگ۔ چِلّ سال ءِ ہاکمی ءِ تہا نصیر خان ءَ بازیں جنگ گوں بلوچ قبیلہاں کتگ ءُ گوں ڈنّی ہاکماں اوں۔

گل خان نصیر وتی کتاب تاریخ بلوچستان تاکدیم 105 ءَ نبشتہ کنت کہ بلوچ ہکومت ءِ اولی جوڑ کنوک میر عمر میروانی بوتگ ءُ میر احمد یار خان اول ءُ میر عبداللہ خان (قہار) ءَ وتی ہوناں گوں بلوچ ءِ ہاکمی رکّینتگ بلئے میر نصیر خان اول ہما مردم بوتگ کہ اولی رندا بلوچ سیمسر ئےِ ٹاہینتگ ءُ پہازتگ ءُ بلوچ ہاکمی کلیں بلوچستانءَ مہکم کتگ۔

نصیر خان اول ءِ یک نزوری یے اے بوتگ کہ آ گوں مذہبی جنون ءَ ڈنءَ در اتکگ ءُ مذہب ءِ نام ءَ ہزاراں بلوچ کُشتگ۔ بازیں جاگہاں وتی ہاکمیءِ برجم دارگ ءِ واستا لُٹّ ءُ پل ءِ ہمراہیءَ بلوچ ڈیہانی سرا ارش کتگ ءُ بازینے کُشتگ۔ بلے راجدپترءَ اے ہبر چو درپشناکیں استال ءَ است اِنت کہ چہ اوگانستان ءِ شاہاں بلوچ ہاکمی ءِ آجو کنوک ہم ہما بوتگ۔ چہ نصیرخان اول ءَ پیسر بلوچستان ءُ کشمیر ءِ سرا اوگانستان ءِ شاہ ءِ ہاکمی بوتگ ءُ ہر خانے کہ پہ کلات (بلوچستان) ءَ دارگ بوتگ یا بلوچستان ءِ اندگہ ہنداں کہ یک سروکے دارگ بوتگ ،گڑا الم اوگانستان ءِ شاہ ءِ رزا مندی ءُ منشاء ہوار بوتگ۔ بلئے نصیر خانءِ جہد ءُ قربانیاں پد بلوچ چہ اوگانستان ءِ اثرءَ آجو بوتگ اَنت۔

Don’t miss posts from Balochistan Times!

We don’t spam!

+ posts

Iltap Baloch has been associated with journalism for many years. He writes on social, historical and literary issues.

Leave a Comment