Home / Balochi / میان رودراتک ٹرمپ ءِ نوکیں پالیسانی وداریگ

میان رودراتک ٹرمپ ءِ نوکیں پالیسانی وداریگ

اِے نبشتانک  10 نومبر 2016 ءَ بی بی سی اردو ءَ شنگ بیتگ۔

امریکہ ءِ سروک گچین بوگ ءَ رند میان رودراتک (مشرقِ وسطٰی) ءِ بازیں رہشوناں ڈونلڈ ٹرمپ ءَ را مبارک بات داتگ بلے بازیں مُلکانی سروک وداریگ اَنت کہ اے دَمگ ءِ تہا امریکہ ءِ کوْہنیں پالیسیانی تہا چے بدلی کئیت؟

بی بی سی ءِ اہوالکاراں نوکیں امریکی سروک ءِ گچین بوگ ءَ  میاں رودرتکی مہلوک ءِ ردِ عمل زانگ ءِ جُہد کُت۔

عراق ءُ شام: کوئنٹن سمرویل،موصل

عراق ءِ شہر موصل ءَ دولتِ اسلامیہ ءَ گوں جَنگ ءُ حکومتی آپریشن ءِ سر ءَ ڈونلڈ ٹرمپ ءِ سروک بوگ ءَ رند ہچ پرک نئیت۔

عراقی فوج موصل ءِ نیمگا جُنزان اِنت ءُ شدّت پسندیں گَل دولتِ اسلامیہ پد کِنزگ ءَ اِنت۔

بِلّے کہ عراقی فوج ءِ کاروَڑ (حکمت عملی ) ءِ سرا بازایرادگری بوگ ءَ اِنت بلے آہانی آپریشن سوبمند بوگ ءَ اِنت۔

بلے شام ءِ جیڑہ کمّو دگہ رنگ ءَ اِنت۔ ٹرمپ ءَ چہ پیسرا امریکہ ءُ میانہ رویں یاگیانی (معتدل باغی) شریداری ءِ سرا سوال چِست کُتگ۔ میان رودراتک ءِ جیڑہانی گیشوار ءِ درگت ءَ آئی ءَ شام ءِ سروک بشار الاسد ءِ نزّیکیں اتحادی روس ءَ را گیش کُمک کنگ ءِ سرازور داتگ اَت۔

اسرائیل ءُ فلسطین:تھامس فیسی، یروشلم

اسرائیل ءِ سروزیر بنیامین نتین یاہو ءَ ٹرمپ مبارک بات داتگ ،آئی ءِ توسیپ کُتگ ءُ آئی ءَ را اسرائیل ءِ راستیں دوست گْوشتگ۔

اسرائیل ءِ سروزیر ءَ گْوشتگ کہ آ ’’دَمَگ ءِ تہا ایمنی ،سلامتی ءُ سیکیورٹی ءِ شرترکنگ ءِ ہاتر ءَ گوں آئی (ٹرمپ) ءَ ہمکاری ءِ واہگدار انت‘‘۔

اسرائیل ءِ نیمگا یروشلم ءِ کُہدہ ءَ چہ دْرستاں پیسر ٹرمپ مبارک باتی دات۔ ٹرمپ ءِ مُہیم چلائینوکاں گْوشتگ اَت کہ آہانی سرکار اے پاکیں شہر ءَ ’’بے بہر ءُ بانگ ءَ اسرائیلی ریاست ءِ مزن شہر(دارالحکومت)‘‘ منّیت۔

ٹرمپ ءِ کیمپ ءِ اے بیان ءَ فلسطین دلگران بوت کن انت پرچا کہ آ لوٹ اَنت کہ دیمتر ءَ رودرتکی یروشلم فلسطینی ریاست ءِ مَزن شہر بہ بیت۔

فلسطین اتھارٹی ءِ سروک محمود عباس ءَ ڈونلڈ ٹرمپ مُراد باتی دات ءُ اُمّیت ظاہر کُت کہ آئی ءِ دور ءَ ’’ایمنی‘‘ بیت۔

انّی زانَگ نہ بیت بلے ڈونلڈ ٹرمپ ءَ اسرائیل ءُ فلسطین ءِ جیڑہ ءِ گیشوار ءَ دو ریاستی حل ءِ پلّہ مرزی کُتگ۔

ٹرمپ ءَ گْوشتگ اَت کہ دَمگ ءِ تہا ایمنی ہما وہد ءَ کئیت وہدے فلسطینی چہ وتی دل ءَ پہ اسرئیل ءَ تشدد ءُ کینگ ءَ ہلاس بہ کن اَنت۔

غزوہ ءِ دمگ ءَ کنٹرول کنوکیں فلسطینی گروپ حماس ءِ جارکش ءَ گْوشت کہ فلسطین ءِ مہلوک ءِ سرءَ امریکہ ءِ سروک ءِ مٹ بوگ ءَ چہ باز پرک نہ کپیت پرچا کہ فلسطین ءِ واستا امریکہ ءِ پالیسیانی تہا تعصب مان۔

آئی ءَ گْوشت کہ ما پُر امّیت اِیں کہ امریکہ ءِ سروک ٹرمپ وتی پالیسیانی سرءَ چار ءُ بچار کنت ءُ فلسطین ءِ جیڑہانی سرءَ آہانی تہا ہم سَنگی کار اِیت۔

اسرائیل ءِ تْرند تَبیں مردماں اُمّیت ظاہر کُتگ کہ ٹرمپ غربِ ارد ن ءَ نوکیں یہودی آبارکاریانی ہلاپ ءَ ہبر نہ کنت۔

ایران : محسن اضغری ،تہران

بَلّے کہ بازیں ایرانیانی واستہ ہیلری کلنٹن ءُ ڈونلڈ ٹرمپ ءِ مانا یک اِنت بلے گِچینکاریانی بے گَتیں آسر ءَ آ الّم ابکّہ اَنت۔

یک سیاسی باسکے ءَ گْوشت کہ امریکہ ءِ صدارتی گچینکاری ءِ آسر ءَ آہانی ہیال ہما انت کہ برطانیہ ءِ چہ یورپی یونین ءَ درآیگ ءِ وہد ءَ بیتگ۔

بازیں ایرانیانی ہیال ءَ ایران ءِ جوہری معاہدانی سر ءَ ٹرمپ ءِ دور ءَ گیش جنجال ءُ جیڑہ بیت۔

ایران ءِ پیسریگیں سروک اکبر رفسنجانی ءَ ریپبلکن صدارتی اُمیدوار ءَ را تُرسناکیں ءُ بے رہبندیں مردمے گْوشت۔

ایران ءِ بازیں سیاستدان ہمے سرپد بنت کہ ڈونلڈ ٹرمپ ءِ تہہا دنیا ءِ مہلوک ءِ سرا اسرانداز بوگ ءِ بودناکی چہ براک اوبامہ ءَ کمتر اِنت۔

آ گُشنت کہ اے ہساب ءَ ٹرمپ ءِ صدارتی دور سَک اِہم انت۔

خلیجی مُلک: فرینگ گارڈنر

سعودی عرب ءِ شاہ سلمان ءَ ہما دمان ءَ ٹرمپ مبارک بات دات ءُ اُمّیت ظاہر کُت کہ آئی ءِ دور ءَ میان رودراتک ءَ ایمنی کئیت۔

امریکہ ءِ اتحادی مُلک کویت ءُ متحدہ عرب امارات ءَ ہم مبارک باتی دات۔

واشنگٹن ءِ پہ سعودی ءِ دائمی دژمن ایران ءَ نرمی ءَ سعودی ءِ واکدار تکانسُر بوتگ انت۔ پمیشکا آہاں ٹرمپ ءِ تْرندیں موقف وش آتک کُتگ۔

مردمانی ہساب ءَ خلیجی مُلکانی تہا ٹرمپ ءِ بارہ ءَ ہر کس جتائیں مارشتے داریت۔ ۔ٹرمپ ءِ اسلام مخالف بیان ءِ سرا ہود ءِ مردم دلگران بوتگ اِت اَنت بلے انگت ہم بازیں مردمے آئی ءَ جْوانیں رہشونے ءِ ہساپ ءَ دوست دار ایت پرچہ کہ آ وتی ہیالاں بے ریا ءُ رو دْرنگاز کنت۔

میان رودراتک ءِ روتاک ءُ سوشل میڈیا

دَمگی میڈیا ءَ چوناہا اے تاثر گندگ کئیت کہ وائٹ ہاؤس ءَ ہر کس بئیت عربانی سر ءَ ہاسیں پرکے نئیت۔

دْرائیں اہمیں عرب ٹی وی چینلاں امریکہ ءِ صدارتی گچینکاری ءِ کوریج  کساس بے ریا بوتگ۔

عرب نیوز ءِ ویب سائٹاں گچینکاری ءِ آسر ءَ را ’کرامات‘ ، ’سیاسی زلزلہ‘ ءُ ’اُمّیتانی چپ‘‘ گْوشتگ۔

سوشل میڈیا ءَ عرب ءُ مسلمانانی بابت ءَ ٹرمپ ءِ بیاناں آئی ءِ نا اُمّیتی ءُ بد تبی ءِ سبب گوْشگ بوتگ۔

سوشل میڈیا کارمرز کنوکیں عرب اے گپّ ءَ  گوں تِپاک کن انت کہ آہانی رد ءَ امریکہ ءِ ردیں پالیسیانی تہا ہچ بدلی نئیت۔

بلے بازیں مردمانی ہیال اِنت کہ کم چہ کم ڈونلڈ ٹرمپ ’وتی دُژمن ءَ زانت‘ وہدے کہ ہیلری کلنٹن وت ’چیریں دُژمنے‘ بوتگ۔

About Waleed Lal Baloch

Check Also

سیہ گوْات ءِ ڈیہہ

نودان ۔ تپتگیں سِنگ ءُ سْریمُگیں کوہانی ڈیہہ۔ گوریچ، لوار ءُ سیہ گوْات ءِ ہنکین۔ …

Leave a Reply

Your email address will not be published. Required fields are marked *