Home / Balochi / جون

جون

مہ تُرس کس ھچ نکنتیں، من گشت۔ آئی ءِ ساہ پُر بوھگا نہ اَت چہ ترسءَ۔ مئے کار ات وہد وہد ءِ سرا یکے دومیءَ گندگ۔

یک روچے، مدام ءِ پیما من وتی جاگہ ءَ سر بوتوں۔ من چارت آ چہ وہد ءَ ساری نشتگ ءُ سگریٹ کشگا انت۔ من زانت گپے است۔

ما ہچ گپ نہ کت۔ آ چہ من دور نشتگَ ءُ یپّیما منا چارگا ات- من ہم نزیک ئے نہ شتوں۔

باز دیر ءَ رند حاموشی پُرشت۔ منی دست ئےِ گپت ءُ گشت: من سور کنگائوں۔ پدا منی دست ئےِ چُک اتنت۔

من گپ نہ کُت۔ آئی چمّانی تہا چارِت، بلئے ہچ نہ دیست۔

منا انگہ آ شپ یاد انت وہدے مئے لوگ ءَ مہمان بوتگ ءُ اتکگ ات۔ اولی رند کہ منا دیست ئےِ انچو چارت ئےِ من گُشت آئی ءِ چم منا ایر برنت، بلے چو نزانت کہ اینچو زوت۔ من ہمینچو زانت کہ مئے دوریں سیادے۔

یک روچے گشت ئےِ تو منا دوست بئے- منا ترُس ات گپ ءِ کنگ  کہ بلکیں مات ءَ ہال دنت۔

آئستہ آئستہ منا باور کنائینت ئےِ کہ ہچ نہ بیت۔ پدا منا سک دوست بوت۔ منا دوست چیا مہ بوتیں کہ منی کرا نادوستی ئے ہچ گُنجائش نسیت ات- آ عمرءَ کجا عقل کار کنتیں۔ انچیں روچے ات دلءَ گُشت بال بو انچو کہ مُرگءَ، اے زند بس یکیں ساہت انت۔

نوں گیشتر مئے لوگ ءَ روگ ءُ آیگا آت۔ ماہ پہ ماہ لوگا اتک۔ ما چیروکانی گند ءُ نند شروع کت۔ دوستی دیما روان ات۔ من زانت ما سک دیما شتگاں۔ یک روچے من گشت تو منا اینچو دوست دارئے گوں من سور بکن۔ گُشت ئےِ شر مات ءِ گوما گپ کئیں۔ منا انتظارءَ دمبرت، بلے مات ءَ ہبر نیاؤرت۔

پدا ہما کزا ءَ کہ آیگی ات، اتک۔

مات ءَ منا سک جت۔ آئیءَ اے گپ باور نہ بوت کہ آئی ءِ سیاد منی گوما اے وڑ کنت۔

منی کرا ہچ راہ نیست ات۔ ماتءَ وتی علاج ءِ نامہ ءَ منا زرت کراچی ءَ شُت۔ من وس کت کہ یک رندے آئی ءِ گوما گپ کئیں، بلے ھچ وڑا گپ نہ بوت۔

یک روچے من فون کت- گشت ئےِ منی نام ءَ مہ گر نیکہ سک حراب بیت۔  منی توکا پدا ہچبر ھمت نیاتک کہ آئی ءَ یک رندے وتی ذہن ءَ  جاگہ بہ دئیں۔

نُہیں ماہ انچو گوست انت کہ نہہ سال اتنت۔ روچ ءُ شپ ہزاب۔

داں من آزاد بوتوں۔

 وہدے مات ءَ ڈاکٹرءَ را گشت کہ بہ کش ئےِ، گنداں تپلیں جونے ہسپتالءِ کوٹئ ءَ  کپتگ  آئستہ آئستہ وتا وت ورگا انت۔ کس ءَ نہ زانت کدی جون گار بوت۔

 

About Meher Janul

Check Also

The Baloch Conflict with Iran and Pakistan — book review

By Hassan Hamdam In his latest book, ‘The Baloch conflict with Iran and Pakistan: aspects …

Leave a Reply

Your email address will not be published. Required fields are marked *