News Desk

دَری جہانءَ بلوچ جیڑہ ءَ پدا سر کَشّتہ

مئی 2016ءِ دہمی روچ ءَ چہ یو این پی او (اَن ریپریزینٹِڈ نیشنز اینڈ پیپلز آرگنائیزیشن) ءِ نیمگا واشنگٹن امریکہ ءَ دو جتائیں دیوان بوت۔ یک دیوانےءَ ماں ”کارنیگی اِنڈوومنٹ فار اینٹرنیشنل پیس“ ءَ بلوچستان ءَ انسانی ہکّانی جاورہال، میڈیا ءِ آزاد ی ءُ اِندگہ جیڑہانی سرا ہبر بوت۔

اے دیوانءِ بندات ءَ امریکہ ءِ شیڈو سینیٹر پول اسٹراس ءَ مردم وشّ اتک کتنت ءُ یو این پی او ءِ منّت گِپت کہ اے رنگیں دیوانے ماں واشنگٹن ءَ برجم داشتگ ئِے۔

دیوان سے پینَلءَ بہر کنگ بوتگ اَت۔ یک پینلےءَ ایمنسٹی انٹرنیشنل ءِ ڈائریکٹر انٹرنیشنل ایڈووکیسی، واجہ ٹی کُمار، کمیٹی ٹو پروٹیکٹ جَرنَلسٹ ءِ ایشیا ءِ پروگرام ڈائریکٹر بوب دیتزءُ بلوچ اہوالکار ملک سراج اکبرءَ بہر زُرت ءُ گُشت کہ بلوچستان ءِ تہا زالمی ءِ دودے دیما روگا اِنت۔ آہاں گشت کہ اے پدّر انت کہ سرکارءُ سرکارءِ ادارہ انسانی حقاں پادمال کنگا اَنت، بلے دنیگہ ہچ گُنہگار پرے ظلم ءُ زوراکیاں گِرَگءُ سزا دیگ نہ بوتہ۔

hal

اے پینَلسٹاں بلوچستانءِ جیڑہءِ درہیں شَریدار دَزبندی کت اَنت کہ بلوچستان ءَ زور جنءُ کائیءَ کَم بکننتءُ انسانی حقانی لگتمالیاں کَمتِر بکننت۔

بلوچستان اسمبلی ءِ پیسری اسپیکر وحید بلوچ ءَ گشت کہ بلوچستان ءِ جیڑہ تہنا انسانی ہکّانی مسلہ ءِ بُنیاد ءَ چارگ مہ بیت۔ بلوچ وتی سرڈگارءِ سرا گوں اسلامی جہادیاں جنگءَ اِنتءُ اے درہیں جہادیانی پُشت پاکستان ءِ سرکارءُ فوج اَنت۔

امریکی صحافی مائیکل ہُگسءَ امریکہءِ پالیسیانی سرا تنقید کت ءُ بلوچستانءِ باروءَ امریکہءِ اسٹیٹ ڈیپارٹمنٹءِ نادلگوشی ایر جَت۔

یورُپی پارلیمنٹ ءِ باسک ءُ ساوتھ ایشیا ءِ مُلکانی نیام ءَ تعلقانی وفد ءِ سَرکَماش جِین لیمبرٹءَ دَزبندی کت کہ بلوچستانءَ درہیں سَر بائد اِنت سِیز فائر بکننتءُ جنگءَ مَہتَل بدارنت، ءُ چہ پاکستانءِ سرکارءَ لوٹ کت کہ بلوچستانءِ پیسری سَروزیر اختر مینگلءِ شَشیں نُکتہانی سَرا غور بکنت۔

نامی ئیں نبشتہ کار، طارق فتحءَ گُشت کہ بلوچ بائد اِنت وتی زورءَ نَزّ بیاریتءُ پہ آزادیں بلوچستانءَ وتی گاماں تینزتر بکنت۔ آئیءَ گُشت کہ بلوچ بائد اِنت بزانت کہ گوں چونیں پیچیدہیں دُشمنےءَ جنگءَ اِنت۔

یو این پی اوءِ دومی پروگرام ءِ تہا کانگریس ءِ باسکانی واستا بریفنگ یے بوت۔ بلوچ جیڑہ ءِ سَرا ہبر حال بوت۔ اے پروگرامءِ گیشتر دلگوش گوں اے چیزءَ اَت کہ بلوچستانءِ جیڑہ ءِ جند چی اِنتءُ چہ پیما چارَگ بوت کنت۔

اے دیوانءَ بلوچستان اسمبلیءِ پیسری اسپیکر وحید بلوچ، یو این پی اوءِ صدر ناصر بلیدی، بلوچستانءِ سرا کتابےءِ نبشتہ کار ڈاکٹر حُسین بُرءَ ابید امریکی کانگریش مین لوئی گوہمرٹ ہم گون اَت۔ گوہمرٹءَ 2012ءَ ہم ڈینا روہرا بیکرءِ ہمراہیءَ بلوچستانءِ سرا کانگریسءِ ہییرنگےءِ انتظام کتگ اَت۔

کانگریس مین، لوئی گوہمرٹءَ دیوانءِ دیما یَک رَندے پَدا گشت کہ بلوچ مئے دوست اَنتءُ امریکہ بائد اِنت بلوچستانءِ آزادیءَ کُمک بکنت۔

یو این پی اوءِ صدر ناصر بلیدیءَ گوں بلوچستان ٹائمز ءَ گُشت کہ اے رنگیں دیوان بلوچءِ جیڑہ ءَ گیشینت نہ کننت بلے یکے گامے دیما المّا برنت دانکہ دنیا اے جیڑہ ءِ نیمگا بچاریت۔ آئیءَ گشت کہ اے دیوانانی مولءُ مراد ایش اِنت کہ امریکی قانون ساز بلوچستانءِ جاورءُ بلوچ جیڑہءِ نیمگا دلگوش بہ کننت۔

ناصرءَ گوں بلوچستان ٹائمزءَ اے ہم گشت کہ ہمے مَردم کہ چہ ملکءَ اینگو دَرملکاں آہان اَنت، چہ ایشانی آہگ ءُ کار کنگءَ کار گیشتر دیما رَوان کننت۔

چہ اے دیوان ءَ پیسر گوَستگیں ماہ ءَ بی این ایم ءِ دَرملکانی جہگیر حمل حیدر ہم ماں یورپی پارلیمنٹ ءِ باسکانی گوما گِندَگ بوتگ اَت۔ حمل حیدرءَ ہم گوں بلوچستان ٹآئمزءَ ہمے گوَشتگ اَت کہ اے چست ءُ ایر کہ انوں بوگءَ اَنت، اے بلوچءِ جیڑہءَ گیشینت وَ نہ کننت، بلے اے کارانی دیمرَوی یے۔ ءُ بلوچءِ توار ہمے رنگءَ دیما شُت کنت۔

سال 2012 ءَ امریکی کانگریس ءَ بلوچستان ءِ سرا قرارداد ءِ پیش بوگ ءَ رند درملکاں بلوچانی سفارتی چِست ءُ ایر نہ بوگ ءِ برابر بوتگ انت۔ بلے چرے نوکیں سُرپُراں ہمے زانگ بیت کہ بلوچ جہدکاراں مارِتگ کہ تاں ڈنّی دنیا شرّیں وڑے ءَ ہمراہ کنگ مہ بیت، بلوچ وتی جہد ءَ پہ شِہمی دیما بُرت نہ کنت۔

Don’t miss posts from Balochistan Times!

We don’t spam!

+ posts

Leave a Comment