Home / Balochi / چیئرمین گُلام محمد: چیزے ترانگ ۔۔۔ ہپتُمی بہر

چیئرمین گُلام محمد: چیزے ترانگ ۔۔۔ ہپتُمی بہر

 تاج بلوچ گوں چئیرمین ءَ گوازینتگیں وہد ءِ ترْانگاں نبشتہ کنگ انت۔ چوں کہ ہپتمی بہر دیر ءَ رند شِنگ بوگ ءَ انت شما کسّہ روانی سرپد بوگ ءِ واستا  ششمی بہر ءَ ادا ونت کن اِت۔

لہتے سنگت شُت بازارءَ پہ جلسہ ءِ جارءِ جنگ ءَ کہ مرچی بیگہہءَ، دپترءِ دپءَ بی این ایمءِ جلسہ اِنت کہ اشیءِ تہا بی این ایم ءِ چیئرمین واجہ گُلام مہمد بلوچ تران کنت۔ اِدا جلسہانی دگہ بازیں روایتانی تہا یکے ہمیش اَت کہ گاڑی یا موٹر سیکل ءِ سرا مردم گَشت اَنت ءُ اسپیکرءِ دپ ءَ اعلان کنان کت ءُ جلسہءِ ٹائمءُ جاگہ گُشان کُت۔

چہ بِٹءَ (کہ انوں ما ہمودا اتیں) دیم پہ روبَرکت ءَ چِبّ، سُلو، مَیناز یکیں لینءَ اَنت ءُ چہ یکے دومیءَ کِساس سےءُ چار کلومیٹرءِ فاصلہءَ اَنت۔ چہ مینازءَ دیم پہ روبرکت ءَ الندور اِنت ءُ کمّو گِستا اِنت۔ ہمینچو گِستا کہ چہ مینازءَ داں الندورءَ برَس ئے، اَنچو ژَند بئے کہ تئی حیالءَ بلیدہ تُربت ءِ سفرے جَتہ۔

یَک وہدے، کہ ما اسکولءَ وانَگا اتیں تہ الندورءَ ہائی اسکول نیست اَتءُ الندورءِ سَنگت بٹءَ وانَگا اَتک اَنت۔ ہالانکہ چہ الندورءَ کہ بلیدہ اَتک ئے تہ اولی میتگ میناز اَت۔ میناز تاں بٹءَ کِساس بیستءُ پَنچ، سی کلومیٹرءِ سفر اَت۔ بلے الندورءِ گیشتری سنگت ءَ اے گیشیں سفر انگہ سَرا کتءُ بٹءَ اَتک۔ چیا کہ الندور مُنشی محمد ءِ میتگ اَت ءُ میناز ایوب بلیدیءِ۔ ءُ اے دوئیں خاندانی نیامءَ دوری ءُ نہ وَشّی مرچی ئیں گپے نہ اَت۔ ایوب ءِ پت محمد عظیم بوتہ کہ بودی ئیں مردمے بوتہ، بلے چہ محمد عظیم ءَ گیش ایوبءِ ناکوءُ محمد عظیمءِ برات، مُکّی محمد بودِناک بوتہ۔ مُکّی محمد یَک معتبرے بوتہءُ مُنشی محمد یکّے۔ ءُ بلیدئی ءُ زامرانیانی نیامءَ اے صف بندیءِ یک چستءُ ایرے چہ ہما وہداں بوتہ۔ وت ماں وتءَ سیاد اَنت ہم۔ بنداتءَ کہ ایوب سیاستءَ اَتءُ پارلیمانی سیاست نیست اَت تہ اے جنگ، چہ مُکّی محمد ءُ محمد عظیم ءِ وفاتیءَ رَند مزنیں حدّےءَ سَرد تَرّ اِتگ اَت ءُ ایوب اے درستانی مشترکہ لاڑُک اَت۔

بلے وہدے پارلیمانی سیاست اَتک، ووٹءُ الیکشناں معتبری ءِ نظامے دوبارہ دیما آران کُت۔ یکے دومیءِ دیما ووٹ ءَ اوشتگ اَت۔ چہ ایوبءِ واقعہءَ رَند، الندور چہ بلیدہ ءِ اِندگہ میتگاں سَرجمءَ کَٹ بوتگ اَت۔ اے نیمگ ءِ مردمانی آ نیمگا روءُ آ کَم اَت ءُ آ نیمگ ءِ مردم اے نیمگا سَک کَم اتک اَنت۔ جاور داں اینکسءَ سَر بوتگ اَت کہ یک رَندے ایوب ءِ بَچ، عظیم جان، کہ آ وہدی کَسان اَت، گاڑیءِ سَرا چہ الندورءَ کہ گوزیت تہ گاڑیءِ سرا تیرگواری کنگ بیت کہ اے علاقہ آہانی واستا بندیں علاقہے۔

چہ بٹءَ دیم پہ رودَراَتکءَ، کورءِ دومی دستءَ کوشکءِ بازار اِنت۔ سنگت پوٹوہار سوزوکی ءِ سَرا اے درہیں میتگاں گَردانءُ جلسہءِ جارءَ جَنان بوت اَنت۔

اے نیامءَ، ہمے لوگءَ، مستریں کوٹیءَ، سنگت نشتگ اِتنت۔ چئیرمین گُلام محمد ادارُکی ہاموش اَت، ءُ لالا ہم۔ چرے ہاموشیءَ، بے گُشگءَ ہمے مارگ بوگءَ ات، کہ چئیرمین ءُ سنگت ہمے ودارءَ اَنت کہ میزبانیں سنگت بی این ایم ءِ میٹنگءَ کَدی بندات کننت۔

دیوان بندات بوت، ایجنڈہ ایر کنگ بوت اَنت۔

گوں چئیرمین ءَ دَزبندی کنگ بوت کہ بلوچ جُنزءُ بی این ایم ءِ راہ ءُ رَہبندانی سرا حَبر بکنت۔ حَبر کِساس ہما یکین اِتنت کہ چِدءُ پیش باز برءَ کنگ بوتگ اتنت ءُ من پیشتری بہرانی تہا ہم نبشتہ کتگ اتنت۔ اے حَبرانی سرا کَس ءَ دگہ اختلافے ہم نیست اَت ءُ دیوانءَ نشتگیں سنگتاں کَسےءَ سوالءُ جستے ہم نیست اَت۔ اشیءِ یک مزنیں سَوَبے وَ بلیدہ ءِ وتی حالات اتنت۔ اے دیوانءَ نشتگیں مردم دیر اِنت سیاستءَ گون بوتگ اتنت۔ بازیں مردمے چہ نوزدہ سَدءُ ہشتادءِ زمانگءَ، بازینے نَوَدءِ زمانگءَ ءُ لہتیں سنگت چہ دوہزارءَ گون اَت۔ بلے یک گپے اے درہی سنگتانی نیامءَ گیش اِتگ اَت۔ اے ہندءُ دمگاں، چہ نوزدہ سَدءُ ہشتادءِ زمانگءَ، ہما وت ماں وتی کَشّءُ چیلے کہ شروع بوتگ اَت کہ نوزدہ سَدءُ نَوَدءُ پنچءَ گوں ایوب ءِ کُشگ ءَ وتی عروج ءَ سَر بوتگ اَت، اشیءِ ذمہ دار (اے دیوانءَ نشتگیں درہیں مردمانی نِزّءَ) ذاتی صورتءَ ڈاکٹر مالک ءُ آئیءِ ٹولی، ءُ مجموعی صورت ءَ پارلیمانی سیاست اَت۔ اے دیوانءَ نشتگیں سنگت کہ چہ نوزدہ سَدءُ ہشتادءِ زمانگءَ سیاستءَ گون اتنت، اشانی تہا بازیں مردمے وَ تہنا ری ایکشنَری اَت، ءُ نوکیں نیشنل پارٹیءُ آئیءِ معتبرانی صف بَندیءِ خلافءَ وتی بندءُ بستے کنگءَ دلمانَگ اتنت۔ مردمءَ زانت کہ اے مردم داں دیرءَ آجوئیءِ جُنزءَ گون نہ بنت، بلے گوں چئیرمینءَ پیشگی بحثاں رَند ہیال ہمیش اَت کہ اگاں کَسے آجوئیءِ جنزءَ چار گام ہم ہمراہ بیت، تہ ایشیءِ تہا باکے نیست۔

گیشتر بحث بلیدہءِ جندءِ جاورانی سَرا بوت۔ چیئرمینءِ دوشی ئیں، سُہبی ئینءُ انونیں گپانی سرا کہ جیڑگا اتاں تہ ہمے گُمان بوت کہ چئیرمیں ہمے جیڑگءَ اِنت کہ بلیدہ ہما بلیدہ اِنت، تہا ایوب کُشگ بوتہ۔ ءُ من وتی دلءَ ہم زانگا اتاںءُ چیئرمینءَ را پیسرا ہم گوشتگ اَت کہ چو نہ اِنت۔ بلیدہ پیسرا ہم ہمے بوتہ، بلے پیسرا ایوب زندگ بوتہ پمیشا بازیں چیز گِندَگ نہ بوتہ۔ ءُ شما تہنا ایوب دیستہ۔ ایوبءِ بازیں ہمراہ، آہانی یک ءُ تہنائیں کِردارءِ تہا نہ دیستہ۔

میٹنگ ءِ گُڈسَرا بلیدہ ءِ آرگنائزنگ باڈی جوڑ کنگ بوت۔ ءُ فیصلہ بوت کہ کارانی ترتیب دئیگءِ واستا بی این ایم ءِ آرگنائزنگ باڈی وت بہ نندیت ءُ سَلاہءُ مشورہ بکنت۔ من آرگنائزرءِ حسابءَ اے گپ دیما ایر کت کہ زونءِ تہا چہ ضلع یا مرکزءَ کَس مداخلت مکنت دانکہ کار ہما رنگءَ بوان بکننت کہ آرگنائزنگ باڈی اش تشکیل دَنت۔ چیئرمین ءَ اے گپ ہم مَنّ اِتءُ ضلعی آرگنائزرءُ مرکزی عہدہ دار (کہ گون اتنت) گوَشت اَنت کہ بے چیئرمینءِ حال دئیگءَ بلیدہ زونءِ کارانی تہا دَست ماں جَنی مکننت۔

بیگاہ بوت، جلسہءِ وہد بوت۔ شُتیں۔

عصر گوَستگ اَت۔

ناکو ہیبتانءِ ہوٹلءَ پیسر، مئے کبینّ، کہ تقریباَ بلیدہءُ زامُران ءَ کتاب ءِ یکیں دُکان اَت، ءِ دیما گاڑی داشت۔ چہ گاڑی ءِ کِرّا بگر، داں ناکو ہیبتانءِ ہوٹل، دانکہ نائب ءِ دپترءِ دیما، کہ جلسہ ءِ اسٹیج اَت، دانکہ چہ دپترءَ بگوَزئے ءُ کامریڈءِ دُکانءِ دپ ءَ بروئے، کساس نیم کلومیٹر دراجی اِنت ءُ دو گاڑیءُ دو موٹرسیکلءِ گوزَگءِ کَدءَ پراہی، مردم ہمک نیمگا مانرِتکگ اَت۔

چیئرمین کہ چہ گاڑیءَ ایر اَتک، داں جلسہ گاہ ءَ شُتیں، مردم آہان ءُ دست مِلّائینان، چیئرمین ہمک مردم ءَ انچو دست ملائینگ ءَ اَت کہ دیمءِ مردمءَ پکا ہمے باوَر بوگا اَت کہ منا پجہ آرَگا اِنت۔ بچکندان اَت۔

جلسہ شروع بوگا پیسر منی حیال ہمیش اَت کہ تہنا چیئرمین گپ بجنت، اے واستا کہ عصرءُ مغرب سک نزیک اَنت۔ مغربءِ بانگءَ جلسہ ہلاس کنگی اَت۔ بلے چیئرمینءُ رحمت اللہ ءِ حیال ہمیش اَت کہ لالا ہم حبر بکنت۔ جلسہ بِندات بوت۔

حاجی نظرءِ کوہنیں دُکّان کہ یک دپے دیم پہ گوریچانءَ اَت، کہ دیما مین روڈ گوَزَگا اَت، دومی دپءِ دیم گوں رونِندءَ اَت کہ روڈ تاں دورءَ گِندگ بوت، چَپّی کَشءَ صاحبدارءِ پیٹرولءِ دُکان، دُکانءِ کَشءَ نائبءِ دپتر۔ حاجی نظرءِ ہمے دُکانءِ رونندی دروازگ ءِ دپءَ اسٹیج اَت۔ ہاک ءِ ڈیوالءِ سَرا بی این ایم ءِ بینَر، چار کُرسی۔

لالا ءِ مستریں مشکل اش اَت کہ گُٹّ ئِے شُتگ اَت (چہ پنجگورءِ بازیں تقریراں)۔ بلے اسٹیج ءَ اَنچو کہ اَتک، شہیدانی سُہریں سلام پیش کنگ ءِ وہدا بِل تُری آست آستءَ گپءَ اَت بلے مردمءَ زانت کہ توکا جذباتی تقریرے نِشتہ کہ دَرآہگءِ واستا زور جنگءَ اِنت۔ گپ درُست نیشنل پارٹیءِ سَرا اتنت۔

چئیرمین ءِ باریگ اتک۔

”بسم اللہ الرحمٰن الرحیم“، چیئرمینءَ گپ بندات کت۔

”کُلّاں پیش مں ایوب جانءُ ہما کُلّیں بلوچ شہیداں“، ءُ آست آستءَ مائیک راستیں دست ءَ کُت ءُ چپیں دست ءِ مُک اسٹیج ڈائسءِ سَرا ایر کت، ”کہ سُہریں سلام پیش کناں کہ آہانی جُہدانی بدولت ءَ بلوچ راجی آجوئی جُنز کہ استیں داں روچء مرچیءَ بَرجاہ اِنت۔

ایوب بلیدیءِ علاقہ ءِ غیرت مندیں بلوچاں، بلوچ جہدء آجوئی ءِ شہیدانی تہا ہما شہید ہم ہوار اِنت کہ آئیءَ شُما درست کہ استیں شَرّیءِ سَرا زان اِت، ہمے ہندءُ دمگاں نندوک بیتہ، گوں شُما کُلّاں ہورءُ ہوار بیتہ۔ مرچی کہ است انت ایوب جان ءِ جند مئے شمئے نیامءَ ساڑی نہ اِنت بلے آئیءِ جہد ءُ آئیءِ نظریہ کہ استیں ما شُما درُستانی دلانی تہا زندگ اِنت۔“

بلیدہ ءِ سیاست ءَ یک رَندے پدا مردمانی گَرمجوشی یے گِندَگ بوگا اَت۔ ہما کوہنیں سیاسی ورکر کہ چہ ایوبءِ واقعہءَ رَند چہ سیاستءَ یک کر بوتگ اتنت، جلسہءِ تہا ظاہر اتنت۔ چم اش چیئرمین ءِ نیمگا سَکّ اتنت ءُ یقین ءُ بے یقینی ءِ انچیں تاثرے چہ آہانی چماں ظاہر بوگا اَت کہ مردم ءَ زانت کہ کوہنیں ارمان اِش یک برے پدا چست بوان اَنت۔ گوں گیشتر مردم ءَ چہ اے جلسہ ءَ پیش ہم حال احوال بوتگ اَت۔ گیشتر مردمءِ باروا چیئرمینءَ وَ نام گپتگ اَت ءُ جست کتگ اَت کہ چون اِنت مرچاں؟ ہما مردمانی کہ چیئرمینءَ جست کتگ اَت، آ گیشتر ہمے جلسہءَ نندوک اتنت۔ شنگءُ شانگ۔

”ما شُما درُست اے گپءَ زانیں کہ بلوچ وطن ءِ سرا پہ زورے کہ استیں قبضہ کنگ بیتہ۔ چہ ہما روچ ءَ کہ ناپاکیں پاکستانی فوج ءَ مئے وطن قبضہ کتہ، ہما روچ ءَ بلوچ ءَ اے ناجائزیں قبضہ ءِ خلاف ءَ کہ استیں جدوجہد بندات کتہ۔ ہزاراں بلوچ فرزند ءَ وتی وطنءِ آجوئیءِ جنزءَ وتی سر کہ استیں قربان کتگ اَنت۔ بلے مئے نام نہادیں مڈل کلاس سیاستدانءَ، وتی ذاتی ءُ گروہی مفاداتانی واستا ہمے شہیدانی حون کہ استیں بہا کتگ اَنتءُ گوں پاکستانی فوجءَ ہمزان بیتگ اَنت۔“

بلوچ سیاستءِ، نوزدہ سَدءُ ہشتاد ءِ ہما موڑءِ سرا کَسانیں تمہیدےءَ رَند، چیئرمینءَ یک رندے پدا ایوب بلیدیءِ کیس پَچ کُت۔

”ایوبءِ کہ استیں کوشارینگءَ ذمہ دار کہ استیں ہمے نام نہادیں مڈل کلاس لیڈرشپ ءُ اشی ءِ کہ استیں پارلیمانی سیاست ءِ پالیسی بیتگ اَنت۔ اے واستا کہ ایوب کہ استیں جہدء آجوئی ءِ سنگتے بیتہ ءُ چہ پارلیمانی سیاستءَ کہ استیں اختلاف دارگا بیتہ۔“

بلیدہءِ مہلونکءَ سیاستءِ تہا دیم گوَشی، چہ ایوبءِ زمانگءَ عادت کتگ اَت۔ گپءُ تقریرانی تہا ڈپلومیٹک زُبان مہلونکءَ ہچ دوست نہ بوتگ اَت۔ءُ چیئرمین گُلام محمد ءِ بہادریءِ کسہ اے ہندءُ دمگاں چہ پیسرا موجود اتنت۔

نوزدہ سَدءُ نَوَدءِ پارلیمانی الیکشنءَ کہ ایوب ءُ منشی محمدءِ نیام ءَ کَشءُ چیل بوتگ اَت ءُ بلیدہ ءِ لہتیں جاگہءَ دوبارہ ووٹ بوگا اَت تہ جاڑین نامیں کوہی پولنگ اسٹیشنےءَ، ڈاکٹر یاسینءِ ہمراہیءَ گُلام محمد ہم پولنگءِ سرا ایجنٹ ات گوں۔ ووٹءِ دورانءَ وہدے منشی محمد ءِ تپنگی مردم کایَنت، درہیں نیمگاں گھیرا کننت، پولنگءِ سَرا کایَنت، مردماں گوَشنت کہ ”یک کِرّ بئیت کہ ما وت ووٹ جنین ءُ مان کنیں“، تہ چیئرمین گُلام محمد جواب کنت کہ ”ما یک کِرّ نہ بئیں“۔ چہ ہمے تپنگیاں یکے نزّیکءَ کئیت، تپنگءَ کاک کنتءُ گوَشیت، ”وتی جندءَ مہ کوشارین“۔ تہ چیئرمین پاد کئیت، مردءِ دیم پہ دیما اوشتیت، چمانی تہا چماں سَک دنت ءُ گوَشیت، ”تئی مالءُ متا دُزّی اِنت، تئی ڈولیں مردم منا کُشت کنت“؟ تہ مردم گوَشنت کہ اے تپنگی چہ وتا ہلاس بنت، حیران بنت ءُ اِندگہ مردماں پہ ہَلوَت گوَشنت، ”اشیءَ پہ حُداءِ دوستیءَ نادین اِت ءُ سرد کن اِت، ما وتی راہ ءَ رویں۔ اے مارا چو بے عزت کنت، نہ ما کُشت ئِے کنیں، نہ یلہ دات ئِے کنیں“۔

”مردماں گَشتہ ءُ ہمے گپ جتہ کہ گُلام محمد کہ استیں زُبیدہ جلال ءُ محمد علی رندءِ دستءَ بہا بیتہ۔ بلے من کہ استیں اے مردماں گوَشگ لوٹاں کہ گُلام محمد کہ استیں بہائی مالے نہ اِنت۔ گُلام محمد اگاں بہائی مالے بیتیں گُڑا شُمئے ڈولءَ چم جہل بیتگ اَت۔ ءُ زبیدہءُ محمد علیءِ تہا کہ استیں اے جُرات نیست اِنت کہ گُلام محمدءِ بہا زیرگ ءِ گپ ءَ بکننت۔ بہا بیتگیں مردم ہما اَنت کہ بلوچ قومی جہدءُ بلوچ شہیدانی حون کہ استیں وتی ذاتی مفاداتانی خاترا بلوچ دشمنیں پاکستانی ریاستءِ کرا بہا کتہءُ پنجابی فوجءِ کہ استیں کاسَہ لیسیءَ کنگا اَنت۔ بلے من ہما کُلیں بلوچ دشمن قوتانءَ کہ استیں گوَشگ لوٹاں کہ بلوچ قوم ءَ یک رَندے پدا وتی وطنءِ آزادیءِ جہد کہ استیں بندات کتہ۔ ءُ اے رَندی بلوچءَ فیصلہ کتہ کہ تاں وتی حونءِ آخری قطرہ ءَ کہ استیں وتی قوم ءُ وتی سرزمینءِ کہ استیں دفاع ءَ کنت۔ بلوچ قومی فوج انتہائی بہادریءِ گوما کہ استیں قابضیں ریاست ءِ خلاف ءَ جنگءَ اِنت۔ اے جنگ بلوچستانءِ کُنڈ کُنڈءَ کہ استیں چست اِنت۔ ءُ اے جنگ، قومی آزادی ءِ اے جُنز کہ استیں چہ ما شما کُلاں ہمے تقاضہ کنگا انت کہ ما شما یک مُشت بہ بئینءُ وتی سرزمین ءِ دفاعءَ کہ استیں گیشءَ گیش متحرک بہ بئیں۔“

جلسہءِ تہا نشتگیں مردمانی دیمءِ سَرا کَسان کَسانیں نازُرکیں بچکندے پدّر بوان اَت۔ چہ اسٹیجءَ کساس چار پنچ گامءَ، دیم پہ دیمءَ، نائبءِ دپترءِ مزنیں سیاہیں گیٹ ءِ دیما شہید عبدین، سَرسُٹُکّ ءَ نشتگ ءُ چیئرمین ءِ نیمگا چارَگا اَت۔ آئی ءِ چَپّیں کَشءَ، یکءُ دو مردمءَ آ دیم، شہید الطاف زمینءَ نشتگ اَت، دوئیں کونڈ مِکّ اتنت، دستانی مُکّ کونڈانی سَرا، ءُ دوئیں پنجگ گوں یکے دومیءَ بَستگ اَتنت، گوں بَزیں سیاہیں ریشاں، چَم نَزّ آورتگ اتنت ءُ چیئرمین ءِ نیمگا چارَگا اَت۔ کَشءُ کِرّا نشتگیں کوہنین ءُ مرچاں خاموشیں سیاسی ورکرانی چمانی تہا نازُرکیں اَرسے سر کَشّان اَت ءُ چمانی تہا کہ چاران ات ئے تہ گُمان بوت کہ پورا کَسانیں لیٹے نوکی روک کنگ بوتہءُ کَم کَم ءَ روشنا بوان اِنت۔

 نائبءِ دپترءِ سیاہیں گیٹءِ دپءَ نشتگیں مردمانی لَڑ گیشتر ہما اَت کہ رَندا درہی کاراں دیم دیمءَ اَت، ءُ کم کمءَ چہ لڑءَ کم بوان بوت اَنت۔

اے سیاہیں گیٹ ہم ایوب ءِ نشانی اَت۔ اصلءَ چش اَت کہ نوزدہ سدءُ ہشتادءِ بنداتی زمانگءَ اے کَسانیں، پَٹَکّیں ڈیوالے اَت۔ ہمے وہداں کہ جیوَنیءَ یاسمین شہید کنگ بوت، تہ درہیں جاگہاں ریاستءِ خلافءَ زہرشانی بوت۔ یک روچے، جہل بیگاہءِ وہدا، اناگہہءَ، اسپیتیں سوزوکی جیپے اَتک، لہتیں دَموکّہیءَ اے دپتر گھیرا کتءُ تپنگ کاک کت اَنت، سپاہیانی تپنگ پچ گِپت اَنت، ایوب مَلّان بوتءُ اَتک، دپترءِ دروازگ پروشتءُ درہیں فائلءُ دپتر مان داشت اَنت۔ رَندا اے دپترءِ ڈیوال بُرز کنگ بوتءُ مزنیں گیٹے دپءَ دئیگ بوت۔

سرکارءِ خلافءَ، ہما جرات مرچی پدا سرا چِست کنگا اَت۔ ہمے انتظامی نظامءِ خلافءَ مردم وتی باسکانی تہا زورے مارَگا اتنت۔

ہمے گپانی تہا چیئرمینءِ توار بُرزءَ بُرزتِر بوان اَت ءُ مغربءِ بانگ بوت۔ چیئرمینءَ گپ ہلاس کت۔ بانگ کہ ہلاس بوت تہ من جلسہ ءِ ہلاسیءِ جار جت۔

جلسہ انچو کہ ہلاس بوت مردم پِرّ رِتک اَنت چیئرمینءَ۔

”عظیم جان اَتکہ ءُ کامریڈءِ دُکانءِ دپءَ نِشتہ“۔ سنگتےءَ ہال دات۔ ”برئیں عظیم جانءَ چاریں“، چیئرمینءَ، گوں مردماں دست ءُ دروہ بوانءَ، ہمے نیامءَ گوَشت۔ ءُ ما گَردان بوتیں۔

About Taj Baloch

mm
Taj Baloch is a poet and linguist. He published the first anthology of his poetry in 2016 in both Roman and Arabic scripts.

Check Also

چیئرمین گُلام مہمد: چیزے ترانگ ۔۔۔ ہشتمی بہر

چا ءُ رَند مسلسل گوں چیئرمینءَ حال احوال۔ گَرد ءُ تَرّ۔ تچ ءُ تاگ۔ یَک …

Leave a Reply

Your email address will not be published. Required fields are marked *