Home / Balochi / بیا او ہَم مَرگ

بیا او ہَم مَرگ

منی ہَم مَرگ
بیا
نوں اے ارواہ چہ بالادءَ دَرآہگ لوٹیت
داںکَدءَ مَرگءَ بِدروہیت کَسّے
دانکَدءَ لاشےءِ پَجّار مہ بیت
دانکَدءَ وابدَرے گار بہ بیت۔
ہردمانءَ کہ اے دَگانی سرءِ تاج، منی نامءُ نشانءِ رَندا
وتی پہلو، وتی کامپولءُ درہیں ہَڈّءُ سِلءَ باہینیت،
جنترے سرجمیں بالادءِ شماں ودینیت۔

دانکہ وشبوئیں توارے مہ رُدیت، داں سَمارے درہیں بالادءِ شَماں ایر مَرئوت
ساہ نہ رئوت۔
ما، تو ہَم مَرگ
بلے بیاءُ برئو
منی ہم مَرگ، منی تا، منی گاریں ٹُکُّر
اتکگ ئے تو تہ دلءِ سرجمیں امروزءَ درُشان کن، ءُ بِگیچ، لیس بِدئے
منی ہم مَرگ منا تراش، پہ مَرگءَ پلگار
بے تو ہرچی منی کَپّی
کپی ئیں مَرگ نہ لوٹاں، منی ہم مَرگ، منی مَنتگیں ٹُکُّر، کہ منی
کپی ئیں زندگیءِ کَپّی ئیں وابانی وڑا راڑ کننت۔
کپی ئیں مَرگ، ہمک زندگیءَ کپی ئیں راہانی سفر
کپی ئیں ٹُکّرءِ نزّآرگءَ اُمرے گوستہ
منی ہم مَرگ
بیا دمانے منا اَمباز، برئو
بیا منی کپی ئیں وابانی، چہ کَرناں شِتگیں بہر، منی تا، منی گاریں ٹُکُّر
بیا منی ہستیءَ وَدّین، بہ آکوش منا
سینگءَ، پہلوءِ چیرا،
گشئے زنگے کہ رُدان اِنت چہ لنٹانی سرا
دانکہ لِلّک، گَلو، ہونءُ رَگاں
کترہ کَترہ منی امروزءَ روان اِنت، درُشان اِنت، رَوان اِنت۔
ہردمانءَ منی ہستی، منی ہربند، منی واب
درُشان اَنت منا
نوں چدءُ دیم وتی بار منی واکءُ توانءَ ڈَنّ اِنت
منی ہم مَرگ، منی تا، منی ہر کپی ئیں بہرءِ اوتاگ
بے تو اِمروز، نہ جَلّیت، ناں گوَزیت

About Taj Baloch

mm
Taj Baloch is a poet and linguist. He published the first anthology of his poetry in 2016 in both Roman and Arabic scripts.

Check Also

The Baloch Conflict with Iran and Pakistan — book review

By Hassan Hamdam In his latest book, ‘The Baloch conflict with Iran and Pakistan: aspects …

Leave a Reply

Your email address will not be published. Required fields are marked *