Seth Halir

بے تواریں بوہیر

بوہیر کئے اِنت؟ چوں زندئِے گوازینت؟ چوں مُرت؟ یکیں دمانءَ ساہ ئِے سِست اگاں سکراتءَ بوت، کَس نزانت۔

بوہیر مردمے ات۔ بے تواریں مردمے کہ اے جہانءَ بے تواریءَ اتکءُ شُت۔ بوہیرءِ پیداک بُوّگءَ سوتءُ سِپَت نہ بوت، بےتواریءَ ورنا بوتءُ بے تواریءَ مُرت۔ نہ زندگیءَ کسےءَ بوہیرءِ نام گپت نہ مرگءَ پد کسےءَ توکل بوت کہ بوہیرءِ کَبرءِشنکءَ آئیءِ نامءَ نبشتہ بکنت۔ نہ چشیں مردمے است ات کہ بوہیرءَ گیر بیارت نہ کسے کہ پہ بوہیرءَ زہیریگ بہ بیت۔ بے تواریں بوہیر بے تواریءَ کَبرءُ کسارت بوت۔

بلے، اے بوہیرءِ اے دنیاءِ کسّہ اِنت، بوہیرءِ نوکیں دنیاءَ بوہیر گوں ڈُہل ءُ ڈومب وش اَتک کُت۔ ہپتیں آزماناں اعلان بوت کہ بوہیر بہشتءَ سر بوتگ۔ پریشتگ چہ گلءَ بال اَتنتءُ ہما پرشتگ کہ بوہیرءِ مَرگءِ ہالءَ سہی نہ اَتنت، آیاں ہال دئیان اتنت۔ ”شما سہی ئے کئے مُرتگ؟ بوہیر! بے تواریں بوہیر“۔

بہشتءِ دروازگءِ دَپءَ کماشیں فرشتہےءَ بوہیر وش اَتک کُت۔ دگہ فرشتہےءَ بادشاہی کرسی یے آورت، دگہ یکّےءَ تاجے گون ات پہ بوہیرءَ۔

  ۔ ”چے بُوّگءَ اِنت اِدا؟ اے کرسیءُ تاج شمارا چیا بَڈّءَ اَنت؟ دنیگتہ اے مرد چہ جُستءُ پُرسءَ نہ گوستگ کہ پہ ہر نوک اتکگیں مردمءَ الّمی انت“۔

فرشتہےءَ اَڑی کُت۔

۔ ”ہؤ، ما زانیں کہ بوہیر چہ جُستءُ پُرسءَ نہ گوستگ، بلے بوہیر وَ پکّائیں بہشتی یے، پہ بوہیرءَ اے ہسابءُ کتاباں کنئے شرّ، نہ کنئے شَرّ۔ شما زانہ بے تواریں بوہیرءَ نزانئے“؟

دگہ فرشتہےءَ اَڑی کنوکیں فرشتہ پسّہ دات۔

کماشیں فرشتہ گوں اے دگہ فرشتہاں گول گولائیءَ اوشتاتگءُ بوہیرءَ داد کنگا ات۔

پہ بہشتءَ بوہیرءَ کرسی یے ایر اِنت؟ پہ بوہیرءَ تاجے؟ بوہیر بے جُستءُ پرسءَ بہشتءَ انت؟ بوہیر ہُشکءُ ہُدا اَت۔ بوہیرءِ دلءَ جَت کہ آ وابے گندگا اِنت۔ واب ہلاس بیت، پدا ہما زندگی، ہما ازابی۔ بوہیر بُتءَ اَت، چمّ ئِے جہل جتگ اَتنت ہمے تُرسءَ کہ چومہ بیت آ کمّے بُسریتءُ واب ہلاس بہ بیت۔ آئی پیسلہ کُت کہ اے واب ہمینچک دراج شت کنت، بلّ ئِے روت، سُرگی نہ اِنت، گُشگی نہ اَنت۔ فرشتہ ہبرءَ اتنت، بلئے بوہیر نزانگا ات چے۔

۔ ”اے مردءِ بزّگیءُ واریءِ کسّہ نہ بیت، بلے اے مردءَ یک روچے اوں گِلگ نہ کُتگ“۔

فرشتہے پہ بوہیرءَ ہبرءَات۔

۔ ”مدام ایوک بوتگ، نہ سنگتے، نہ سیادے، نہ زندگیءَ اسکولے دیستگ نہ نوکیں جوڑہے گُدئِے گْورا کُتگ“۔

۔ ”بدار بدار بدار۔ چرے وش گپّیاں ما رد نہ کپیں“، اڑی کنوکیں فرشتہءَ پدا تہا دورکُت۔

۔ ”اے ہما وہداں ہم بے توار ات کہ اشیءِ نشہی ئیں پِتءَ زمستانی شپےءَ اے چہ لوگءَ ڈن کُورّات۔ ہر کُجا کہ گوریچءَ بران کُت، اے بے تواریءَ روان بوت“۔

۔ ”شدیک ات بلے پہ نانی چنڈےءَ ہم کسے توارئِے نہ جت۔ دَپءِ کار، چمّاں کُت“۔

۔ ”زنڈیں شہرےءَ شُت کہ بلکیں کسے دستے بہ شہاریت، بلے آؤدا ہم چو بے درچکیں تاکےءَ گواتانی میار ات۔ اولی شپءَ چمّانی چیرا بوت۔ بے میارءَ جیلءَ شُت، ترِکّگ ئِے نہ کُت، چہ جیلءَ دراَتک اوں ہچ ئِے نہ گُشت“۔

۔”چہ کارءَ گیش کارءِ شوہازءِ ازابیاں گوَست، گلگ ئِے نہ کُت“۔

۔ ”امیرانی زنڈیں شہرءَ وہدے وراک ئِے دنزءُ ہکّلءَ ابید ہچ نہ رَسِت، ہَمّالی ئِے کُت، چہ وتا مستریں بارئِے بے تواریءَ بڈّءَ کُت، اڑان بوت، کپان بوت بلے گلگ ئِے نہ کُت“۔

بوہیرءِ فرشتہ پہ بوہیرءَ گپ کنان ات۔

۔ ”بزّگءُ بیچارگیں بوہیرءَ اگاں وتی زندءَ وشّی دیستگ گڑا بس یکبرے، کہ آ شپے دمکاں گواز کنان بیت، داں گندیت کہ روڑیےءِ سرا گاڑی یے کلنٹی اِنت کپتگ، ڈریورءِ سر ترکِّتگءُ بیران بوتگ، دگہ جانءَ پُرّیں مردے گاڑیءِ پُشتءِ سیٹءَ زدگ اِنت کپتگ، بوہیر، ہمے مردءَ چہ گاڑیءَ کشّیت، مرد مہروان بیتءُ ہمے گاڑیءَ بوہیر ءَ دنت، بوہیر چہ ہمّالےءَ ڈریورے بوت“۔

۔ ”ہمے جانءَ پُرّیں مرد گوں گاڑیءَ بوہیرءَ وتی جنوزامیں جَنِکءَ ہم دَنت کہ چُکّے گوران انت ئِے، جنینےءُ ننکے کہ نوں بوہیرءَ گُدءُ پُچ کنگی اَنت“۔

۔ ”بلے بوہیرءَ گِلگ نہ کُت“۔

۔ ”ہمے جانءَ پُرّیں مرد کُٹّیتءُ انچو وامدار بیت کہ بے پگارءَ بوہیرءِ واجہ بیت، بوہیر ہچ نہ گُشیت“۔

۔ ”بوہیر ہما وہدا ہم بے توار بیت کہ لوگی ئِے نُنّکءَ بوہیرءِ کِرّا یلہ دنتءُ تچیت، ءُ ہما وہدا ہم کہ ہمے نُنک مزنءُ لائق بیتءُ بوہیرءَ چہ لوگءَ بے لوگ کنت“۔

۔ ”ہما جانءَ پُرّیں مرد دو بر سِٹّءُ دوران بیت، پہ وتا ڈریورے داریت، آئیءِ نوکءُ پتّاکیں گاڑی یکروچے بوہیرءَ، کہ سرئِے پدا ہمّالیءَ کپتگ، گَڑیتءُ بوہیر ہسپتالی بیت، بلے گِلگ نہ کنت، پولیسءَ نہ روت“۔

۔ ”ہسپتال کہ آؤدا ہرکس نارگا انت، گریوگا انت، بوہیر بے توار اِنت، ہیران ہیرانءَ نرسءُ ڈاکٹراں چاریت کہ آئیءِ کِرّا اے واستا سرے نہ جننت کہ آئیءِ کیسگءَ کلدارے نہ گواہیت“۔

۔ ”ہمے ہسپتالءَ بوہیر بے تواریءَ مریت“۔

۔ ”واجہاں! منی واجہاں! بوہیرءَ وتی زند بے تواریءَ گوازینتگ، نوں من ہم بے توار باں“۔

بوہیرءِ فرشتہ وتی گپّاں ہلاس کنت۔

۔ ”بوہیر منی چو! تو باز ازابی سگّتگ، بلے نا شکری نہ کتگ، مدام بے توار بوتگ ئے“۔

۔ ”ہمینچک تو سربرا پرشتگ ئے، ہمینچک تہا، بلے امروزءَ کسءَ تئی سکّی نہ مارِتگ انت“۔

اے ہما فرشتہ ات کہ بوہیرءِ پیسلہ ئِے کنئگی ات۔

۔ ”امروزءَ کسءَ ترا نزانتگ، تو وت ہم نزانتگ کہ ترا بے توار بُوّگی نہ اِنت، گپ کنگی اِنت، تئی پریاتاں امروز سرءُ چیر کت کُتگ اَت، ہلاس کُت کتگ ات، تئی بے تواریءَ ترا ہچ نپ نداتگ“۔

۔ ”امروزءَ ترا تئی بے تواریءِ مُزّ نداتگ بلے اے بہشت اِنت، ترا تئی حق رسیت، ترا ہساب کتاب پِر نیست، جُستءُ پرس پِر نیست، اے بہشت تئی اِنت، ہرچی بلوٹ ئے ہروڑا بلوٹ ئے“۔

مستریں فرشتہ وتی پیسلہءَ دنت۔

بوہیر نوں چمّاں چِست کنت۔ روژناہیں فرشتہانی دیما چاریت۔

۔ ”پکّا“؟

بوہیر بے باوری جُست کنت۔

۔ ”ہئو پکّا، تو بہشتءَ ئے، بلوٹ ہرچی لوٹ ئے“۔

مزنیں فرشتہ بچکندیتءُ گشیت۔

۔ ”پکّا“؟

بوہیر نوں زانت آ بہشتءَ انت، بلے انگتہ یکبرے جُست کنت۔

۔ ”پکّا! پَکّا! پَکّا“۔

اے بری درہیں فرشتہ یکپارگی کوکار کننت۔

بوہیر نوں بچکندیت۔

۔ “من، من اگاں بلوٹاں، ہمک سُہب منا کوپے چاہ گوں گرمیں نانےءَ رَسی“؟

مزنیں فرشتہ گوں ہما فرشتہاں کہ دپ ئِے چہ کندگا پُر اِنت، بوہیرءِ گپّءَ بے توار بنت، چہ اجالتیءَ سرا جہل کننت۔

۔ ”بچارئے وتی بہشتیءَ“۔

ہما فرشتہ کہ بوہیرءِ بہشتءِ ہلاپ اِنت، ٹَہک دنت۔

Don’t miss posts from Balochistan Times!

We don’t spam!

+ posts

Seth Halir is a UAE-based Balochi writer. He mainly writes short, satirical pieces. He also edits and shoots Balochi films.

Leave a Comment