Home / Balochi / بلوچستان ءُ ملا منصور ءِ کوش

بلوچستان ءُ ملا منصور ءِ کوش

محمد اکبر نوتیزئیءِ اے نبشتانک 21 مئی  2016ءَ دی ڈپلومیٹءَ شنگ بوتہءُ تاج بلوچءَ پہ مئے وانوکاں بلوچیءَ رَجانک کُتہ۔

IMG_8782

جولائی 2015ءَ کہ افغان انٹیلیجنسءَ جار جت کہ طالبانانی سروک مُلّا عُمر اصل ءَ دو سال بیت کہ بیران بوتہ، تہ طالباناں مُلا اختر منصور وتی نوکیں سروک جوڑ کت۔ ملا منصورءِ گچین بوگ ءَ افغان طالبانانی دل پروشت۔ ہمے ماہءَ دروگیں حالے گَردان اَت کہ ملا منصور کُچلاکءَ گوں مُخالف ٹولی یےءَ جنگےءَ کُشَگ بوتہ۔ کُچلاکءِ شہر چہ کوئٹہ ءَ بیست ءُ پَنچ کلومیٹر دور اِنتءُ کِساس پنچ لَک مردم اِدا جہہ منند اِنت کہ اشانی گیشتری بہر افغان مہاجر اَنت۔ طالباناں اے حالءِ دروگ ثابت کنگءِ واستا مُلا منصورءِ آڈیو پیغامے شنگ کت، ءُ ملاءَ ہمے پیغامءِ تہا گشتگ اَت کہ آئیءِ کوشءِ حال دروگے۔

بلے مئیءِ ماہءَ، اے بختءَ یلہ دات اَنت۔ طالبان لیڈر چہ تفتانءَ سفر کنگا اَت، تفتان ضلع چاغیءَ اِنتءُ چہ کوئٹہءَ شَش سَد کیلومیٹر دور اِنت۔ اے سفرءَ گونیں مردمےءَ مارا گوَشت کہ ”من مُلا گوشت کہ بَسءَ سیٹے بگر، بلے گپ ئِے نہ زُرت۔ بسءِ بدلءَ، مارا گوشت ئِے کہ گاڑی یے کِرا کن اِت، ما محمد اعظمءَ گوَشت کہ واجہءَ کوئٹہءَ سَر کن۔ ما نزانت طالبانانی امیر اِنت، ما گوَشت ہمے علاقہانی پٹھانے کہ ایرانءِ نیمگا بوتہءُ نوں واپس پاکستانءَ اَتکہ“۔

ملا منصور دیم پہ کوئٹہءَ راہءَ اَت کہ راہءَ، نوشکی بلوچستانءَ، ڈرونےءَ آئیءِ گاڑی جَت، ءُ آئیءِ جندءُ ڈریور محمد اعظم ہما دمانءَ بیران بوت اَنت۔ شروعءَ سرکاری اختیارداراں گوَشت کہ گاڑیءِ تہا ترَکِّناکیں چیز باز مان بوتہءُ ترَکّ اِتگ اَنت۔ بلے علاقہءِ مردم گوَشنت کہ یک کسانیں جہازے گِندَگ بوتہ، ”کَسانیں جہاز“ءَ آہانی مطلب اِنت کہ ڈرونے بوتہ، کہ تراکءَ رَند گاڑیءِ سَربِرءَ تَرءُ مانتَرّءَ بوتہ۔

بازیں تجزیہ نگار گوَشیت کہ اگاں چہ ملکءِ جندءَ کَسےءَ سیاڑی گِری مہ کُتیں مُلّا منصور چُش جَنگ بوت نہ کتگ اَت۔ اے مردمانی حیال اِنت کہ پاکستانءُ امریکہءِ تعلقانی تہا جہلیءُ بُرزی باز اِنت۔ پمیشا اے وتی گپءَ ہمے آسرءَ سر کننت کہ اے حملہءِ واستا، بلکیں پاکستانءَ، چیرءُ کائی، امریکہ کُمک کتہ؟

حکومتی اختیارداراں چہ حکومتءِ نیمگا اے رنگیں مَدَتءُ کُمکےءِ گپءِ سرا انکار کتہ۔ بلوچستانءِ وزیر داخلہ سرفراز بگٹیءَ اے حملہءِ مذمت کتہءُ اشیءَ را پاکستانءِ سلامتیءِ سرا حملہ گوَشتہ۔

امریکی سکریٹری آف اسٹیٹ، جان کیریءَ، چہ میانمارءَ گوَشت کہ منصور ”افغانستانءَ امریکی کارندہ، افغان مہلونک، افغانستانءِ سیکیورٹی فورسزءُ ماں توامیں افغانستانءَ (مئے) دلجمیں اتحادیانی واستا مُدامیں خطرہے اَت“۔

آئیءَ گوَشت کہ ملا منصورءِ سرا حملہ ”دُنیاءِ واستا یَک تَچکیں پیغامے کہ ما مُدام گوں وتی ہموپگیں افغاناں گونیں“۔

”ما اَمن لوٹیں۔ مُلا منصور پہ امنءِ جہداں خطرہے اَت“، کیریءَ گوَشت۔ ”آئیءَ اَمن مذاکراتءُ دوبر نزیکیءِ درہیں چستءُ ایرانی تَچکءَ تَچک مخالفت کرتگ۔ وہد اَتکہ کہ درہیں افغان، جنگءُ جدلءَ بَس بکننتءُ پہ شِہمءُ رَہداریں مستقبلےءَ ہمدَستیءَ جہد بکننت“َ۔

کیریءَ گوَشت کہ آئیءَ پاکستانءِ وزیر اعظم نواز شریف فون کتہءُ حملہءِ حال داتہ بلے نہ گوَشت ئِے کہ اے حال ئِے کَدی داتہ۔

مرکزی وزیر داخلہ چوہدری نثارءَ اسلام آبادءَ پریس کانفرنسےءَ تران کنانءَ، گوشت کہ ”اے حملہ سرا سَر غیر قانونی، ناقابلء قبول، پاکستانءِ سلامتیءُ ہَمبِستگیءِ خلاف اِنت“۔ آئیءَ امریکہءِ سرا بُہتام جَت کہ امریکہ گوں افغان طالباناں اَمن مذاکراتءَ پروشگءَ اِنت۔

گاڑیءِ ڈریور محمد اعظمءِ براتءَ مارا گوَشت کہ ”منی براتءَ نزانتہ کہ اے افغان طالبانانی مستریں لیڈر اِنت۔ اے حکومتءِ ذمہ داری اِنت کہ مردماں پجہ بیاریت، یا مردمے بداریت۔ منی براتءِ کارءُ ذمہ داری اے بوتہ کہ وتی پاسِنجَرءَ منزلءَ سر بکنت، اے وَ آئیءِ مُدامی ئیں کارءُ روزگار بوتہ“۔ ڈریورءِ براتءَ گوں حکومتءَ دَزبندی کت کہ حکومت بائد اِنت آہاں اے تاوانءِ سَرا کُمک بکنت آئیءِ برات چار چُکءِ پت بوتہ۔

سینیئریں پاکستانی صحافی، زاہد حسینءَ ڈانءِ تہا نبشتہ کتگ کہ ”اَنچو کہ افغان طالبانانی مُذاکراتءِ حبر چیر تَرّان اِنت، مُلا اختر منصورءِ کُشگ، امریکہءِ پالیسیءِ تہا ترُندی یے پَدّر کنگا اِنت، طالبانانی نوک گچین بوتگیں سروک نوکی وتی مختلفیں گروپانی تہا وتی طاقتءِ منّائینگءَ کامیاب بوتگ اَتءُ چریشیءِ مَرگءَ افغان بحرانءَ نوکیں تابے وارت۔ اے حملہءِ جند چوں کہ پاکستانءِ تہا بوتہ، پمیشا صورتحال کمو خطرناک اِنت ہم، اے حبر ہم پریشان کنت کہ پاکستان چونیءَ یک ینمگے گوں امریکہءَ اتحادی بیت ءُ دومی نیمگا گوں افغان طالباناں نزیکی کنت، ءُ یکیں وہدا اے دوئیں کاراں چونیءَ برابریءَ داشت کنت۔

جی ایچ کیو راوَلپنڈیءَ گوں امریکی امبیسیڈر ڈیوِڈ ہیلءَ مجلسےءَ پاکستانی فوجءِ سرکماش جنرل راحیل شریفءَ ڈرون حملہءِ سرا سک باز دلرجنی ظاہر کتہ۔ راحیل شریفءَ گوَشتگ اَت کہ ”سلامتیءِ خلاف ورزی کنگءِ اے رنگیں کار دوئیں مُلکانی (پاکستان امریکہءِ) رشتہءَ حراب کنتءُ اے خطہءِ استحکامءِ واستا ہما جہد کہ بوگءَ اَنت، اے رنگیں کار آ جُہداں بے سَمَر کننت۔

:پالیسیانی تہا مزنیں تبدیلی

واشنگٹنءِ ”ووڈرو وِلسن سینٹر فور اسکالرز“ءِ ساوتھ ایشیاءِ ایکسپرٹ، مائیکل کوگلمینءَ گوں ڈپلومیٹءَ گوَشت کہ ”ملا منصورءِ سرا ڈرون حملہ، واشنگٹنءِ پالیسانی تہا مزنیں بدلی یے نشون دئیگءَ اِنت۔ اَنچو لگّگءَ اِنت کہ امریکہءَ پاکستانءِ برداشتءَ دَم بُرتہ، ءُ نوں کارءُ چیزاں تچکءَ وتی دستءَ کنگ لوٹگا اِنت۔ گوں ملا منصورءِ جَنَگءَ امریکہ، پاکستانءَ را تَچکیں پیغامے دئیگ لوٹگا اِنت: ہما سِلہہ بند کہ تئی زمینءَ نشتگ اَنتءُ امریکہءِ مفادانی خلافءَ ہم کارءَ اَنتءُ افغانستانءَ ہم غیر مستحکم کنگءِ جہدءَ اَنت، اگاں تو آہانی خلافءَ گامے چست نہ کنئے، گُڑا اے کارءَ ما وت کنیں“۔

”انگہ نِندگءُ چارَگی اِنت کہ دیما چے بیت۔ بوت کنت کہ اے تہنا بنداتے بہ بیت ءُ امریکہ دیمترا سلہہ بندانی سرا گیشتر حملہ بکنت، تُری کوئٹہ شوریٰ بہ بیت یا حقانی نیٹ وَرک۔ یا بوت کنت کہ اگاں پاکستان، امریکہءِ اے پیغامءَ سرپد بہ بیتءُ وتی زمینءِ سرا موجودیں اے نیٹ ورکانی خلافءَ وت کارروائی بکنت، تہ امریکہ دیمترا چشیں حملہ کنگءَ پہریز بکنت“۔

کوئٹہءَ جہہ منندیں آزادیں صحافی، شہزاد بلوچءَ گوں ڈِپلومیٹءَ گوَشت، ”اے حملہ یک تچکیں پیغامے کہ امریکہ وتی دشمنءَ جَنت، ہرجاگہ کہ بگندیت ئِے، پاکستانءِ تہا ہم، بغیر پاکستانءِ رَضامندیءَ اے کارءَ کت کنت۔ بلوچستانءِ گیشتریں آبادی بلوچ اِنت کہ مذہبی انتہاپسندیءِ خلاف اِںت، بلے اشیءِ لہتیں ضلعءِ سیمسر گوں افغانستانءَ لَگّیتءُ لہتینءِ گوں ہما پشتون قبائلی علاقہاں کہ اودا مذہبی شدت پسندانی خلافءَ آپریشن بوگا انت۔ اے حسابءَ تو گُشت نہ کنئے کہ طالبانانی اہمیں لیڈر بلوچ ڈیہہ ءَ آتک نہ کننت یا نیاہَنت۔ چشیں حال ہم ہست کہ اے مردم بلوچستانءِ پشتون علاقہانی جنوبءَ موجود اَنت۔

آئیءَ گوَشت، ”اے بلوچستانءِ تہا اولی امریکی حملہ اِنت، بلے انچو لگّگءَ اِنت کہ دیمترا ہم چشیں حملہ بیت۔ من وَ حیران بوتاں کہ وہدے ملا منصورءِ لاش کوئٹہ ہسپتالءَ آرگ بوت تہ چہ پاکستانءِ نیمگا ہچ رنگیں تحقیقات نہ بوت۔ کم از کم آٹوپسی وَ ببوتیں کہ دانکہ لاشءِ پجار پَکّا کنگ بوتیں“۔

:ایران لِنک

وال اسٹریٹ جرنلءِ رپورٹ اِنت کہ ملا منصورءَ را امریکہءِ جاسوسی ایجنسیاں ہما وہدا درگیتکہ کہ ایرانءَ وتی لوگءِ مردمانی گِندُکءَ شتہ۔ رپورٹءِ تہا اے ہم گوَشگ بوتہ کہ امریکی جاسوس ڈرون ایران پاکستانءِ سیمسرانی علاقہاں گَردءُ تَرّ نہ کننت۔ بلے داشتگیں رابطہءُ اندگہ چیریں حالاں، ایجنسی کُمک کرتگ اَنت کہ منصورءَ در بگیجنتءُ پرآئیءَ دامے چیر بکننت۔

ملا منصورءَ مُدام جہازاں سفر کتہ، ءُ چشیں حال ہم ہست کہ گوستگیں نُہہ سالءَ چہ پاکستانءِ دو ائیرپورٹءَ مُدام درملکاں سفر کنگا بوتہ۔ یک پاسپورٹےءُ یک کمپیوٹرائیزڈ پاکستانی شناختی کارڈے ہم چہ لاشءِ کِرّا دَست کپتہ کہ اشانی تہا نام محمد ولی نبشتہ اِنت۔ لہتیں حالانی رِدءَ ملا منصور، چہ تفتان بارڈرءَ دو رَندا ایرانءَ شتہ ءُ اَتکہ۔

ایران گشیت اے گپ دروگے کہ ملا منصور چہ حملہءَ پیسر چہ ایرانءَ پاکستانءَ پُتِرتہ۔ ایرانءِ سرکاری نیوز ایجنسی آئی آر این اےءِ رِدءَ، ایرانءِ وزارت خارجہءِ ترجمان حسین جابر انصاریءَ اے گپ دروگے کتہ کہ ملا منصور چہ اے حملہءَ پیسر ایرانءِ زمینءَبوتہ۔

بلے تجزیہ کار گُشنت کہ سے سَوَب ایچین اَنت کہ مردم گشت کنت کہ ملا منصور ایرانءَ بوتہ: یکے ایش کہ چہ 2015ءِ بنداتءَ داعش افغانستانءِ ہما علاقہانی تہا وتی پاداں مہکم کنان اِنت کہ ایرانءِ مَرزءَ نزیک اَنت۔ اے جاگہاں افغان طالبان گوں داعشءَ جنگءَ ہم بوتگ اَنت۔ اے پُژدرءَ بوت کنت کہ ایرانءَ ملا منصور وت داوَت داتہ ءُ لوٹائینتہ۔

دومی حبر؛ بوت کنت کہ ملا منصور ایرانءَ سُنّی بلوچانی گِندگءَ شتہ کہ ایرانءِ تہا دیر اِنت شیعہ حکومتءِ خلافءَ جنگءَ اَنت۔

سیمی حبر؛ افغان پناہ گیر، رودراتکی ایران (مشہدءُ زاہدان)ءَ یلہ کنان اَنت۔ باز تجزیہ کار گشیت کہ طالبان لیڈر آہانی چارگءَ شتہ بوتہ۔

لہتیں چشیں حال ہم ہست کہ ملا منصورءَ گوستگیں نومبرءَ ایرانءَ گوں روسی صدر ولادیمیر پیوتنءَ چیرءُ کائی گِندءُ نند کتہ، ءُ اے گپءِ سرا امریکہءَ گیشتر بَد بُرتہ۔

بہرحال، شہزاد بلوچءِ حسابءَ ”انچو لگّگءَ اِنت کہ بلوچستانءَ آوکیں روچاں مزنیں بُحرانے سرا چست کنت۔ ءُ بلوچستانءَ بازیں ملکےءِ جاسوس چہ پیسرا نندوک اَنت“۔

پاکستانءُ ایران، افغانستانءَ سکیں دُشمنءِ حسابءَ نام کپتگ اَنت۔ 1990ءِ زمانگءَ ایرانءُ پاکستان دگرانی جنگانی کنگءَ ہم ہوار بوتگ اَنت۔ 1996ءَ کہ طالباناں افغانستانءَ حکومت کنگ بندات کت، تہ ایرانءُ طالبان حکومتءِ نیامءَ تعلق لُڑان بوت اَنت۔ 1998ءَ، افغانستانءِ شہر مزار شریفءَ، طالبانانی دستءَ کہ 10 ایرانی کُشگ بوت، تہ اے تعلق بے کساس حراب بوت اَنت۔

:بلوچستانءِ طالبان جَت کنگ

بلوچستان کہ پاکستانءِ کُل زمینءِ چِلّءُ سے دَرسَد اِنت، بُحران زَدہ جوڑ بوتہ۔ اے زمین سِلہ بندیں حملہانی پنجگان اِنت۔ بلوچ سرمچاراں ابید، مذہبی شدت پسند ہم ادا کارروائی کنگا بوتگ اَنت۔

1979ءِ سوویت یونینءِ افغانستانءَ پُتِرگءَ رَند، افغان مجاہدین، حالانی رِدءَ، بلوچستان، خیبر پخنونخواہءُ قبائلی علاقہاں ٹریننگ دئیگ بوتگ اَنت، ہما کُلیں علاقہ کہ گوں افغانستانءَ ہَم مَرز اَنت۔ رَندا کہ امریکہ افغانستانءَ پُتِرت، تہ افغان مجاہد پدا ہمے علاقہاں واتر بوت اَنت۔ بلوچستان چوں کہ افغانستانءِ دپءَ ایر اِنت، بلوچستانءَ افغانانی مزنیں رُمب وتی تہا جاگہ دات اَنت۔ اے رُمبانی تہا طالبانانی باسک ہم ہوار اتنت۔ امریکہ دیر اِنت پاکستانءِ سرا ہمے الزامءَ جنگءَ بوتہ کہ پاکستانءَ طالبانانءَ محفوظیں جاگہ داتہ، خاص طالبانانی مزنیں لیڈر ماں کوئٹہءَ جاگہ داتگ اَنت۔ پاکستانءَ گوَشتہ کہ اے دروگیں بُہتام اَنت بلے چہ 2009ءَ، نیو یارک ٹائمزءِ گشگ اِنت کہ، اوبامہ حکومت اے گپءِ سرا یکوئی چارءُ بیچار کنگا بوتہ کہ ڈرون حملہ بلوچستانءَ ہم کنگ بہ بیت، دانکہ طالبانانی نیٹ ورک شنگینَگ بوت بکنت۔

کوئٹہءِ جہہ منندیں تجزیہ کارےءَ، کہ وتی نام ئِے ظاہر کنگ نہ لوٹ اِت، گوں ڈِپلومیٹءَ گوَشت، ”ہئو، منی نزءَ آوکیں روچاں بلوچستانءِ طالبان جَت بوگءِ خطرہ ہست اِنت۔ اے واستا کہ کوئٹہءِ طالبان وتی نیٹ ورکءَ ودّینان اَنت“۔ تجزیہ کارءَ گوَشت کہ بلوچستانءَ طالبان نظریاتی صورتءَ ہم مہکم تر بوان اَنت ءُ گیشءَ گیش علاقہانی حسابءَ ہم مہکم بوان اَنت۔ اے واستا کہ بلوچستانءِ جہہ منندیں بلوچ گوں طالباناں ہوار بوان اِنت گوں۔

مائیکل کوگلمینءَ گوَشت کہ ”اے وہدی ما بس ہمینچو زانت کنیں کہ پاکستان سَکیں مشکلیں جاگہے۔ سَتَر کہ اے حالتاں آہانی خلافءَ کارروائی کنگ گران اِنت بلے پاکستان اے گپءَ چدءُ دیمتر چیر دات نہ کنت کہ افغان طالبانانی لیڈر بلوچستانءَ اَنت۔ بلوچستانءِ سرا اشیءِ اثر انگہ زانگ نہ بنتءُ اے اثر چو جلدی گار ہم نہ بنت“۔ ”بلوچستان وَ چہ پیسرا مزنیں کَشءُ چیلےءِ تہا اِنت، کہ یک نیمگے آزادی پسندیں سرمچار اَنتءُ دومی نیمگا سرکارءِ ترُندیں کریک ڈاونءُ اِندگہ سیاہیں (ظالمیں) پالیسی اَنت۔ پہ اے دمگءِ پریشانیں مردماں، ڈرون حملہانی سَرا دِلوارَگی، انچیں گَمے بیت کہ بَس ”ہمیشیءِ کمی بوتہ“۔ دِلوارَگیءِ دگہ یک گپے ایش اِنت کہ پاکستان، طالبانانی سرا کریک ڈاونءِ نامءِ سرا، بلوچستانءِ مہلونکءِ سرا وتی کریک ڈاونءَ چدءُ گَنتِر کنت“۔

افغانستان گشیت کہ بلوچستانءِ پشتون آبادیں پَٹّی منی اِنت، ہمے رنگءَ پاکستانءِ اندگہ پشتون علاقہانی باروءَ ہم گوَشیت کہ منی اَنت۔ پمیشا چہ پاکستانءِ بنداتءَ، افغانستانءِ دل پہ پشتونءُ بلوچ راجدوستاں نَرم اِنت۔ دومی نیمگا پاکستان بہتام جنگا اِنت کہ ہندوستان چہ افغانستانءِ راہءَ بلوچستانءَ پاکستان مخالفیں جنگءَ کُمک کنگا اِنت۔ ءُ افغانستان بہتام جنگا اِنت کہ پاکستان، بلوچستانءَ افغان طالباناں محفوظیں جاگہ دئیگا اِنت۔ اے الزام جنءُ کائی ہمے ظاہر کننت کہ اے دمگءِ تہا تعلقات ہمے رنگءَ بُرزءُ جہل مانَنت۔

:پاکستانی پجّار

بلوچستانءَ، بلوچ راجدوستانی گوَشگ اِنت کہ سَد افغان مہاجرءِ تہا ہَشتادءَ را پاکستانی شناختی کارڈ ہَست، نوں اے پاکستانی شہری جوڑ بوتگ اَنت۔ ملا منصورءِ جندءَ را پاکستانی پاسپورٹءُ پاکستانی شناختی کارڈ گون بوتہ۔ فیڈرل اِنوسٹیگیشن ایجنشی (ایف آئی اے)ءَ ہمے زوتاں ایڈیشنل ڈپٹی کمشنر ریوینیو، رفیق ترین ہمے گپءِ سرا دزگیر کتہ کہ آئیءَ ملا منصورءِ کمپیوٹرائزڈ شناختی کارڈ ویریفائی کتہ کہ محمد ولیءِ نامءِ سرا جوڑ کنگ بوتہ۔

دی نیوز انٹرنیشنل، چہ پاکستانءِ مستریں اخباراں یکے، ءُ اے حبرانی حال ئِے شنگ کتہ کہ لوکل افیسرانءَ پہ زورے درآمدیں مردمانی پاکستانی شناختی کارڈانی ٹہینگءِ کار بندَگ بیت۔ وزیر داخلہ چوہدری نثار علی خانءَ حکم داتہ کہ درہیں پاکستانءَ کمپیوٹرائیزڈ شناختی کارڈانی ویریفیکیشنءِ کار دوبارہ کنگ بہ بیت۔

کِیّا قادر بلوچ کہ اسلام آبادءَ نندوک اِنتءُ بلوچستانءِ سرا کار کنت، گوں ڈپلومیٹءَ گوَشیت کہ ”منا یقین اِنت کہ اے مرگءَ تہنا دہشت گردیءِ جنگءِ تہا پاکستانءِ پوزیشنءِ سرا شَکءُ سوال پاد نہ کتگ اَنت، اے شک ہم مہکم تر بوتہ کہ طالبان تحریکءِ انگہ دگہ لیڈر ہم اے علاقہاں ہست بیت۔ گڑا امریکہءُ آئیءِ اتحادی آہانی سرا ہم وتی حملہاں برجاہ دارَنت۔ گشت کنئے کہ اے حملہ بلوچستانءَ اولی ڈرون حملہ وَ بوتہ بلے آخری نہ اِنت“۔

کوگلمینءِ گوَشگءِ حسابءَ، ”اگاں اِدا شرّی ہست تہ ایش اِنت کہ بلوچستانءِ سرا دلگوش وَدّیت، ءُ گیشتر بلوچستانءِ مردمانی نہ گیگیں حالتانی سرا دلگوش روت۔ بلوچستانءِ باروءَ سک کم حبر بوتہ، اے واستا کہ بلوچستانءَ سک کَم روءُ آ بوت کنت۔ نوں بلکیں بلوچستان ءِ سرا گیشتر حبر بوت بکنت“۔

کِیّا قادر بلوچءَ یک گیش دلتپرکہ کنگی حبرے ہم کت۔ گوَشی ”بلوچستان مُدام پہ افغان جنگجوآں پناہیں جاگہے گوَشَگ بوتہ۔ انوگیں حملہءَ منی حیالءَ اے گپ گیشتر ثابت کتہ کہ انچُش اِنت۔ اے اولی ڈرون حملہ، بلوچستانءَ یک نوکیں جنگےءِ دروازَگاں پچ کت کنت“۔

About Taj Baloch

mm
Taj Baloch is a poet and linguist. He published the first anthology of his poetry in 2016 in both Roman and Arabic scripts.

Check Also

Shadows on the wall

When the king is dead When the fire is lit When the skies are bloodshot …

Leave a Reply

Your email address will not be published. Required fields are marked *