Home / Balochi / نُہہ سالی آفتاب ءِ مات ءُ آئی ءِ پِشّی پرائی ءَ وداریگ اَنت

نُہہ سالی آفتاب ءِ مات ءُ آئی ءِ پِشّی پرائی ءَ وداریگ اَنت

تاج بلوچ ءِ انگریزی نبشانتکے کہ سیٹھ ہلیر ءَ رجانک کتگ۔

آفتاب وتی حقّی ئیں مات ءَ نزانت۔ آ چِل روچ ءِ چُک بیت کہ آئی ءِ مات جمالاتون چہ زردوئی ءِ بیماری ءَ بیران بیت۔ مات ءِ بیرانی ءَ پَد آئی ءَ ترُو، بزاں آئی ءِ پِت ءِ گْوہار صابرہ رودینیت۔ آفتاب ءِ دِل ءَ آئی ءِ مات صابرہ اِنت۔

آفتاب ءِ پِت محمد یونس خضدار ءِ اسکولے ءَ ماسٹرے۔ آئی ءَ گوں سیاسی چِست ءُ ایراں ہچ کار نیست۔ بلے صابرہ، کہ نوں آفتاب ءِ مات انت ءُ اسکولے ءَ اُستانی یے، نامی ئیں بلوچ جُہدکار رحیم بلوچ ءِ لوگی اِنت۔ رحیم بلوچ  بی ایس او ءِ چیئرمین بوتگ ءُ بی این ایم ءِ اولی جنرل سیکریٹری۔ پہ آفتاب ءِ بیگواہی ءَ ہمینچک بس انت۔

آفتاب ءَ داں سیمی کلاس ءَ چہ خضدار ءِ پاک اسلامک پبلک اسکول ءَ وَنتگ۔ دو ہزار پانزدہ ءِ گڈ سرا آئی ءِ لوگ چہ خضدار ءَ لَڈّیت دیم پہ کراچی ءَ۔ سَوَب بیم۔

کراچی گلشن حدید ءَ آفتاب رائزنگ اِسٹار اسکول ءَ پنچ ءِ نودَربرے۔

صابرہ گُشی آفتاب ءَ پِشّی سَک دوست بنت۔ ہرکُجا شدیکیں پِشْی یے بگندیت، بَڈّئے جنت کاریت ئِے لوگ ءَ۔ گوں پِشّی ءَ لیب کنت۔ پیسرا پِشّی ءّ نان دَنت، رندا وت وارت۔

صابرہ گُشی یکروچے منا گُشتگ ئِے پہ منا سیکل ئے بزور۔ من مکن کُتگ کہ اِدا روڈ رَش اَنت، تو کسان ئے تئ جند لگت بیت۔ منی سرا کندیتگ ئے ءُ گُشتگ ئے، ”منی مات ءَ بِچار ئے! چوں دِلترک اِنت۔ من بِلّے کَساناں، بلے منا تئی وڑا نہ تُرسیت“۔

پِشّی ءُ سیکل ءَ ابید آفتاب ءَ فٹبالی سک دوست بیت۔ فٹبال چہ کتاباں گیش۔ صابرہ گُشی سجہیں روچءَ بالے گون ئِے بوتگ ءُ لوگ ءَ لیب ئِے کُتگ، برے یک چیزے پروشتگ ئِے۔

بیست ءُ ہشت اکتوبر دو ہزار ہبدہ ءِ شپ ءِ دو ءُ نیم ءَ سندھ رینجرز ءُ پاکستان ءِ چیریں ادارہانی مردماں گلشنء حدید کراچی ءَ آفتاب ءِ لوگ ءَ دور کُتگ ءُ آفتاب ءِ ہمراہی ءَ بیست ءُ چار سالی ئیں رھوت ءُ بیست ءُ پنچ سالی ئیں عارف آوار جتگ اَنت۔

ہمے شَپ ءَ دگہ شَش بلوچ ہم چہ کراچی ءَ آوار جنئگ بیت کہ چراہاں یکّے بلوچ ہیومن رائٹس آرگنائزیشن ءِ انفارمیشن سیکریٹری نواز عطا اِنت۔

چرا شپ ءَ پد آفتاب ءِ ہچ ہال نیست۔ آفتاب ءِ مات ءِ گوما آفتاب ءِ پِشّی ہم وتی دوست ءِ وداریگ اِنت۔

گریوگا پیسر آفتاب ءِ مات گُشی: آفتا بءَ سیندوچ سک وش بیت۔ سبزی ہم۔ باریں ہودا آئی ءَ ورگا چیزے دیگا انت‘‘۔

About Seth Halir

mm
Seth Halir is a UAE-based Balochi writer. He mainly writes short, satirical pieces. He also edits and shoots Balochi films.

Check Also

بے تواریں بوہیر

بوہیر کئے اِنت؟ چوں زندئِے گوازینت؟ چوں مُرت؟ یکیں دمانءَ ساہ ئِے سِست اگاں سکراتءَ …

حسّام بلوچ: دگہ راہے ءِ مساپر

تاج بلوچ ءِ اے نبشتانک سیٹھ ہلیر ءَ چہ انگریزی ءَ رجانک کتگ۔  حسّام ءَ …

Leave a Reply

Your email address will not be published. Required fields are marked *